Працуеце ў калектыве? Распрацоўваеце камандай нейкі праект? Тады вы дакладна сутыкаліся з праблемай падзелу працы, яе адсочвання і абмеркавання. Даводзіцца шмат чаго дзе запісваць, трымаць у галаве і перыядычна трэсці астатніх, каб дамагчыся выніку. Але дзякуючы спецыяльным сэрвісам вы зможаце нашмат прасцей арганізоўваць сумесную працу. Толькі папярэджваем: вынік залежыць толькі ад вас. Ніякая праграма не заменіць плённай працы.
Asana
Даволі простая праграма для сумеснай працы. Тут толькі асноўнае: падзел на праекты, замацаванне задач за пэўным чалавекам, адсочванне выканання, а таксама ўнутраны чат. Таксама сярод бясплатных функцый ёсць прымітыўны пошук. Праграма мае просты, але прыемны дызайн. У інтэрфейсе таксама нічога лішняга, таму засвоіць праграму зможа кожны. Але бясплатная версія дае ліміт – не больш за 15 чалавек у адзін праект. Хочацца больш функцый і анліму – давядзецца плаціць. Цана аднаго карыстальніка складае 10 даляраў на месяц. Дарагавата ці не – вырашаць вам!
З падтрымкай аперацыйных сістэм тут усё традыцыйна: вэб-версія, IOS і Android.
Старонка сэрвісу: https://asana.com/
Meister task
Умоўна бясплатная платформа для сумеснай працы. У адрозненне ад мінулай праграмы, тут няма ліміту на колькасць чалавек. Цікавая плюшка Meister task – функцыя бягучых мэтаў. То бок вы можаце змясціць у спецыяльнай укладцы прыярытэтныя задачы, а вашы калегі змогуць самі абраць, чым ім займацца. Таксама ў праграме можна каментаваць і абмяркоўваць усе задачы, якія будуць узнікаць падчас працы. Платная версія пашырае магчымасці прафесійнай працы. За 8,33 даляра з чалавека вы атрымаеце нелімітаваную інтэграцыю з рознымі сэрвісамі: Dropbox, Google Disc і г.д. Яшчэ дадаецца магчымасць далучаць большыя файлы, аўтаматызацыя і іншыя прыемныя прафесійныя рэчы. Праграма даступна для асноўнага шэрагу аперацыйных сістэм: IOS, Mac, Android i Windows. Сам інтэрфейс і дызайн прыемны і просты, таму вялікіх складанасцяў у засваенні ўзнікаць не павінна.
Старонка сэрвісу: https://www.meistertask.com/ru
Trello
Бадай, самая простая і зручная праграма для планавання і размеркавання працы ў камандзе. Першапачаткова вам даецца тры спісы: «трэба зрабіць», «у працэсе» і «зроблена». Каб пачаць працу, трэба ўсяго толькі дадаць удзельнікаў і запоўніць калонкі задачамі. Калі ёсць патрэба, можна стварыць дадатковыя калонкі і/ці крыху іначай настроіць пляцоўку. Кожную задачу можна каментаваць. Бясплатная версія дае магчымасць дадаць адно з двух паляпшэнняў: каляндар альбо магчымасць галасаваць. Калі што, іх можна у любы час пераключаць. Ліміт памеру 1 файла – 10 МБ. Калі хочаце інтэграцыі з іншымі сэрвісамі, поўныя налады, статыстыку і г.д., то цана прэміум-версіі – 10 даляраў з чалавека. Асноўныя платформы Trello падтрымлівае, а для астатніх ёсць вэб-версія.
Спасылка на сэрвіс: https://trello.com/home
Redbooth
Закрывае нашу падборку англамоўная, але простая ў карыстанні праграма Redbooth. У яе таксама ёсць платная версія, але бясплатныя магчымасці ўражваюць: падтрымка да 5 працоўных прастораў, 2 ГБ вольнай прасторы для файлаў, падтрымка паштовых рассылак, інтэграцыя з Google Disc, Dropbox і г.д. Пашыраная версія каштуе 5 даляраў з чалавека на месяц, што таксама даволі танна ў параўнанні з канкурэнтамі.
Падтрымкі рускай і беларускай мовы няма, але для засваення праграмы дастаткова базавага ведання англійскай. У дадатак, пры першым карыстанні сэрвіс праводзіць навучанне ў выглядзе падказак і картак, таму нават не давядзецца засвойваць усё самому. У праграме ўвогуле нічога лішняга няма, нават дызайн без нейкіх упрыгожанняў. Але пры гэтым выгляд прыемны і ў працоўным настроі.
Даступныя платформы: web, IOS, Android.
Спасылка на сэрвіс: https://redbooth.com/
Багдан Сакалоў
