– “Паэтычны фэст пад вольным небам” – Ганна Новік, студэнтка, сябра Таварыства беларускай мовы
Каб пазбавіць культурніцкае жыццё Гомеля замшэласці, Ганна прапаноўвае правесці фестываль, дзе пад адкрытым небам будуць чытацца вершы. Плануецца, што перад фэстам будзе праведзены майстар-клас з запрашэннем дасведчаных творцаў.
– «Перш чым я памру, я хачу…» – Валянціна Яцэнка, студэнтка
Праект пачаўся ў Новым Арлеане, дзе творца выкупіў закінуты дом, зафарбаваў яго сцяну чорнай фарбай, напісаў “Before I die…” і павесіў кавалачкі крэйды, каб жыхары працягнулі сказ. За першы дзень сцяна была амаль цалкам зафарбаваная. На думку Валянціны, такі праект у Гомелі дапаможа кожнаму гамельчуку задумацца, што ён хоча зрабіць у жыцці.
– “Млын Сонца” , Танцавальныя этна-вечарыны – Валянціна Міронава (рэдактар Веткаўскага музея стараабрадніцтва і беларускіх традыцый ім. Ф. Р. Шклярава), Цімафей Палунін (студэнт БДУКІ), гурт “Млын Сонца”
Паводле аўтараў, этна-вечарыны – добрая альтэрнатыва дыскатэкам. На рахунку іх гурта ужо ёсць 3 праведзеныя вечарыны, але мэта праекта праводзіць іх рэгулярна. Да таго ж плануецца выйсці за межы выключна этнічных танцаў – далучыць да праекта іншых музыкаў, танчыць і вучыцца самым розным напрамкам танцаў.
– Праект “Замчышча” – Марына Сяргеева, кіраўнік клуба гістарычнага мадэлявання і фехтавання “Гридни Мстислава Глебовича”
Праект мае на мэце рэканструкцыю старажытных падзей, асоб, касцюмаў Гомеля. Марына звяртае ўвагу на тое, што ў горада была ўласная майстэрня зброі, што сведчыць пра магутнасць тагачаснага Гомеля. Рэкантрукцыя ўзбраення – гэта стварэнне таго месца, якое будзе нагадваць гараджанам, наколькі даўно ў ім жывуць людзі.
– “Штогадовы фестываль творчай моладзі “Арт-вёска” – Кірыл Краўцоў, фатограф, вандроўнік, займаецца
Кірыл штовосень праводзіць у вёсцы, якая знаходзіцца ў 70 км ад Гомеля, фестываль “Чырвоны кастрычнік”. Цяпер мае задуму запачаткаваць яшчэ адзін фестываль улетку з мэтай прапагандаваць здаровы лад жыцця. Па яго словах, гэта мусіць быць фестываль, які б аб’яднаў інтэрактыўны тэатр, выставы малюнкаў, фотаздымкаў, майстар-класы рамеснікаў, архітэктурныя праекты – вітаецца любая творчая ініцыятыва.
– Арт-хаус, кінематаграфічны праект – Алег Боклаг, мастак
Алег мае канцэпцыю кінематаграфічнага праекта – праблемны твор, які ён прапаноўвае ўвасобіць у эксперыментальнай манеры, шукае аднадумцаў, а таксама якасную тэхніку. Плануецца, што фільм будзе зняты ў Гомелі, а яго рэліз адбудзецца увосень 2013 ці ўвесну 2014 года.
– Гарадскі інтэрнэт-часопіс “The Mag” – Аляксей Чаранкевіч, вэб-дызайнер і праграміст
Сайт The Mag.by працуе з 2012 года, мае 500 – 1000 унікальных наведнікаў на дзень і ўжо 150 аўтарскіх публікацый і фотаспрваздач. Аляксей не хоча спыняцца на дасягнутым, плануе адкрыць офіс рэдакцыі, а таксама пашырыць штат супрацоўнікаў. Мэта праекта – натхніць гараджан гісторыямі поспеху бізнэсоўцаў, якія бяруцца за смелыя праекты, і матываваць іх да стварэння ўласнага бізнэсу, уласных стартапаў.
– Тэатр-цырк “Ікропка” – Ігар Хадыка, студэнт
У аўтара праекта была мара – мець асабісты пераязны цырк. Мара ажыццявілася нават у больш разгорнутым выглядзе – з дапамогай сяброў і знаёмых атрымалася скрыжаваць музыку, цыркавое шоў і тэатральныя пастаноўкі. Але праект не стаіць на месцы, мае вялізнае жаданне развівацца і выходзіць на больш прафесійны ўзровень. Ігару хочацца аранізаваць прадстаўленні на вуліцах Гомеля.
– Пешаходны бульвар – Вольга Хаткоўская, дызайнер
У сучасным горадзе прэстыжна і важна мець сваю пешаходную вуліцу, на такіх вуліцах могуць праводзіцца розныя мерапрыемствы, збірацца вулічныя музыкі, цырк. Вольга прадстаўляе праект пешаходнага бульвару (ад Ірынінскай да вуліцы Пушкіна), працягласцю 1300 метраў. На гэтым участку месціцца шмат гістарычных помнікаў, будынкі, пабудаваныя ў розных стылях, няма вялікай транспартнай нагрузкі. Прапаноўваецца паставіць таксафоны, стылізаваныя пад даўніну ліхтары, пакласці брукаванку, зрабіць wifi-зоны і веласцяжынку.
– “Арт-камора” – ГМКГА “Талака”
“Талака” існуе з 86 года, мае патэнцыял рознага кшталту творцаў, але не мае месца, дзе можна б было ладзіць рознага кшталту творчыя сустрэчы. Да таго ж, па словах прадстаўніцы “Талакі” ў горадзе не хапае месцаў для культурніцкага адпачынку.
– Фестываль ткацтва “Кросенцы” – Пятро Цалка, загадчык філіяла Веткаўскага музея ў Гомелі
Пятро хоча арганізаваць сапраўдны ткацкі фестываль, на якім майстры маглі б не толькі прэзентаваць ужо сатканыя рушнікі, але і папрацаваць над імі проста перад вачыма наведнікаў фэсту. Такі фэст будзе цягнуцца тры дні, падчас яго будуць ладзіцца лекцыі па семантыцы арнамента, канферэнцыі і экспедыцыі. Ткацкі фэст мусіць завяршыцца стварэннем некалькіх макетаў рушнікоў і іншай ткацкай сувенірнай прадукцыі, а таксама выданнем фотаальбома (на дыску) з лепшымі ўзорамі ткацтва. Такое мерапрыемства, на думку Пятра, спрацуе на карысць іміджа ўсёй краіны.
