Усе мы з дзяцінства ведаем, як важна захоўваць правільную паставу. Роўная спіна — гэта падмурак для вашага здароўя і прыгажосці. Да таго ж, зручную і стыльную вопратку таксама прасцей падабраць, калі пазваночнік не скрыўлены. Пра гэта цудоўна ведаюць усе.
Але «ведаць» і «захоўваць» — розныя рэчы. У кожнага шмат фактараў і абставінаў, што псуюць нашу выправу: сядзячая праца, нязручнае спальнае месца, маларухомы лад жыцця і г.д. І звычайна роўнай спіной могуць пахваліцца не так ужо шмат людзей.
У дадзеным матэрыяле прыведзены простыя і лёгкавыканальныя парады для тых, хто хоча захаваць прыгожую постаць гадоў да 100 як мінімум. Варта памятаць, што захаваць заўжды прасцей, чым выпраўляць. І, калі ў вас ужо ёсць пэўныя хібы з пазваночнікам, лепш звярнуцца да спецыяліста.
1. Матыў
Нягледзячы на тое (а, хутчэй — у нейкай ступені нават «дзякуючы» гэтаму), што з самага дзяцінства мы адусюль чуем пра важнасць захавання роўнай выправы, мала хто мэтанакіравана гэта робіць у паўсядзённым жыцці. Вось праўда, колькі разоў за дзень вы ўзгадваеце пра сваю спіну (канешне, калі яна вас не турбуе болем)? Такія пастаянныя з усіх бакоў нагадкі пра тое, як важна трымаць выправу, паступова ператвараюцца ў «фонавы шум». І вы ўжо проста не ўспрымаеце яго як нешта сапраўды важнае, тое, на што варта звяртаць увагу.
Фота: a-mediya.ru
Таму, першае, што трэба зрабіць для свайго пазваночніка, гэта абраць для сябе і глыбока ўсвядоміць, для чаго вам правільная выправа. Няварта якарыцца адразу на ўсім: і для здароўя, і для лёгкага дыхання, і для прыгажосці... Абярыце адну дакладную мэту, якая найбольш імпануе вам. І неабавязкова яна мусіць быць глабальнай. Можна нават штосьці накшталт: «хачу роўную выправу, каб вось тая кашуля мне больш пасавала». І кожны раз, калі вам захочацца сагнуць спіну, згорбіцца, узгадвайце пра сваю мэту і распроствайце плечы!
2. Вобраз з дзяцінства
Кім вы марылі стаць у дзяцінстве? Не прафесія, а статус: каралевай, прэзідэнтам, усемагутнай чараўніцай ці супермэнам? Узгадалі? Калі нічога такога ў дзяцінстве вам не хацелася, то ніхто не забараняе пафантазіраваць зараз.
Ярка і дэтальна ўявіце сабе гэты вобраз, «прымерце» на сябе. Наўрад ці каралева або ўсемагутны чараўнік (фея, супермэн ці каго вам падказала ваша фантазія) вам бачыцца сутулым. Вось і замацоўвайце гэты стан: высока паднятая галава, роўная спіна, выпрастаныя плечы. Час ад часу ўзгадвайце гэты вобраз (па дарозе на працу ці дадому, седзячы за камп’ютэрам ці з кнігай у руках) і «падцягвайцеся» да яго!
3. Прэч з плеч!
Як часта і якія грузы вы носіце? Узважце сваю «паходную» торбачку з самым неабходным. Калі яе вага перавышае пару кілаграмаў, лепш свой паўсядзённы скарб насіць у пляцаку, каб нагрузка размяркоўвалася больш раўнамерна. Калі ж вы аматар торбаў на адно плячо ці тэчак-партфеляў і ніяк не можаце адмовіцца ад іх, то сачыце за тым, каб насіць іх папераменна ў правай і левай руцэ.
Фота:nastroenie.tv
Так, гэтая парада старая, як сам свет. Але ж груз бывае не толькі фізічным. Ці заўважалі вы, як сутуліцца і горбіцца чалавек, чымсьці моцна заклапочаны, нават, калі ў яго ў руках няма ніякага груза? Ментальны груз (празмерны клопат, няўпэўненасць, страх і д.п.) таксама прыціскае нас да зямлі, замінае разгарнуць свае плечы, выпрастаць спіну.
Такі груз не пакладзеш у заплечнік, не размяркуеш больш раўнамерна. Лепш за ўсё, канешне, ад яго пазбаўляцца: праблемы вырашаць, страхі пераадольваць. Але, натуральна, што гэта не заўжды магчыма тут і цяпер. Калі вы адчуваеце, што не можаце разгарнуць плечы і выправіць постаць таму, што вас гнятуць думкі і эмоцыі, зрабіце наступнаее практыкаванне. Заплюшчыце вочы і спакойна падыхайце. Уявіце сябе на сонечнай палянцы і побач таго, каму вы цалкам давяраеце (хтосьці з вашых блізкіх, сяброў, магчыма, далёкі продак альбо ваш анёл ці святы — гэта можа быць хто заўгодна). Перадайце ўвесь свой клопат яму/ёй на час. Вось проста ўсё-ўсё: хатнія клопаты, трывогі за дзяцей ці бацькоў, вучобу, недаробленыя праекты, абяцанні... Абсалютна ўсё, што вас прыгнятае зараз. Глыбока ўдыхніце і ўявіце крылы за сваёй спіной, уявіце, як бы вы сябе адчувалі без усяго таго, што зараз перадалі сваёй даверанай асобе. Адчуйце гэты стан лёгкасці, бесклапотнасці. Скажыце сабе: «Я спраўлюся з усім!» і можаце назад забраць усе свае клопаты, не забыўшыся падзякаваць таму, хто іх трымаў увесь гэты час. І пасля кожны раз, як адчуеце, што жыццёвы вір прымушае вас горбіцца, рабіце такое простае практыкаванне.
Чытайце па тэме: Як перамагчы свой страх: 5 метадаў
4. Крыху фізікі
Канешне ж, захаванне прыгожай выправы не абыдзецца без фізічных практыкаванняў. Калі ў вас ёсць спартыўнае хобі (фітнэс, танцы, спартыўныя гульні і г.д.), то з гэтым не мусіць узнікнуць праблем. Вы заўжды можаце параіцца са сваім трэнерам, як можна дапамагчы сабе захаваць роўную спіну.
Калі ж вашыя інтарэсы вельмі далёкія ад любой фізкультуры, можам параіць наступныя лёгкадаступныя для ўсіх практыкаванні.
1) «Японскі імператар»: устаньце роўна, падыміце рукі над галавой, выцягніцеся ўверх як мага мацней. На ўдох — рукі павярніце далонямі адна да адной, на выдах — разгортвайце іх далонямі вонку. Так трэба зрабіць 10 — 15 разоў. Практыкаванне варта паўтараць некалькі разоў на дзень, асабліва, калі вы шмат часу праводзіце ў сядзячым стане.
2) «Ля сцяны»: прыхініцеся спіной да любой роўнай паверхні так, каб патыліца, лапаткі, ягадзіцы, лыткі і пяткі краналіся сцяны. Усё. Варта так пастаяць 3 — 5 хвілін і спакойна падыхаць. Выконваць некалькі разоў на дзень.
Ілюстрацыя: yandex.by
Як бачыце, сачыць за сваёй выправай вельмі лёгка, калі рабіць гэта свядома. Здароўя і прыгажосці вам!
Чытайце яшчэ:
Вікторыя Лебедзева, budzma.org
