17 лістапада кампанію “Пяцісотгоднасць” прадстаўлялі ў Магілёве паэты Уладзімір Мароз, Георгій Ліхтаровіч і Анатоль Зэкаў. Адбыліся чатыры сустрэчы з чытачамі – у дзяцячай бібліятэцы №3, у бібліятэках імя А.С.Пушкіна, імя Карла Маркса і імя Янкі Купалы.Кожны з выступоўцаў пачынаў сваю размову са згадак аб нашым першадрукары Францыску Скарыне.

Уладзімір Мароз расказаў аб дакументальным фільме “Францыск, сын Скарынін”, які быў зняты ў 1990 годзе, аб сваёй рабоце над сцэнарыем фільма “Першадрук”, які цяпер знаходзіцца у вытворчасці на студыі “Летапіс” Нацыянальнай кінастудыі “Беларусьфільм”. Ён акцэнтаваў, што постаць Скарыны напоўніцу яшчэ не асэнсавана, што яго веліч нам яшчэ трэба ўсведамляць. Паэт чытаў свае вершы, прысвечаныя Францішку Скарыне і беларускай мове, а таксама лірычныя вершы з новай кнігі “Крыжы на ростанях”.

Георгій Ліхтаровіч прадстаўляў свае новыя кнігі чатырохрадкоўяў “Ліхратыкі”, якія складаюць дылогію. Таксама чытаў вершы з кнігі “Агульны сшытак”, якія дапасаваліся да тэмы “Пяцісотгоднасці”.

Прыхільна сустракала аудыторыя слухачоў і выдомага паэта Анатоля Зэкава, які прадстаўляў свае шматлікія выданні як для дзяцей, так і для дарослых, чытаў вершы і пародыі.