12 кастрычніка ў межах кампаніі “Пяцісотгоднасць” паэт Міхась Скобла і спявачка Таццяна Грыневіч-Матафонава выступілі ў СШ 42 г. Магілёва.
У прасторнай актавай зале сабраліся спачатку старшакласнікі, а затым вучні малодшых і старэйшых класаў. Сталічныя госці пазнаёмілі школьнікаў са сваёй творчасцю (паэтычнай і песеннай), падаравалі ў школьную бібліятэку свае кнігі і дыскі.
З захапленнем юныя слухачы ўдзельнічалі ў бліц-конкурсах на лепшае веданне айчыннай гісторыі і літаратуры, жыва адрэагаваўшы на зварот паэта: “Не пазнаю вас у маўчанні, сябры мае магіляўчане!”. Найбольш кемлівыя і дасведчаныя вучні былі адзначаныя памятнымі прызамі.
