25 кастрычніка ў Віцебскім дзяржаўным універсітэце імя П. Машэрава прайшла гістарычная лекцыя-віктарына “Пяцісотгоднасць”, прысвечаная юбілею беларускага кнігадрукавання, што ладзіцца грамадскай культурніцкай кампаніяй “Будзьма беларусамі!” і ГА “Саюз беларускіх пісьменнікаў”.
Таццяна Грыневіч-Матафонава ў акружэнні гледачоў
У чытальнай залі ўніверсітэцкай бібліятэкі сабраліся не толькі студэнты гістарычнага і філалагічнага факультэтаў, але таксама віцебскія школьнікі, выхавацелі дзіцячых садкоў горада і слухачы курсаў перападрыхтоўкі.
На сустрэчы прысутнічалі супрацоўнікі ўніверсітэта, бібліятэкары, сярод іншых былі: рэдактарка газеты “Мы і час”, кіраўніца віцебскай абласной філіі ГА “СБП” Анастасія Лазебная, сябра філіі, празаік Франц Сіўко. Выкладчыца і загадчыца ўніверсітэцкага літаратурнага музея Ірына Саматой выконвала таксама і ролю мадэратаркі імпрэзы.
Усевалад Сцебурака
Памочнік старшыні ГА “СБП”, паэт і лектар Усевалад Сцебурака пазнаёміў аўдыторыю з яскравымі старонкамі пакручастага лёсу беларускай кнігі, знакавымі постацямі, цікавосткамі і таямніцамі яе багатай гісторыі. Удзельнікі і пераможцы віктарыны атрымалі прызы ад арганізатараў.
Таццяна Грыневіч-Матафонава і Усевалад Сцебурака
Сустрэча завершылася выступам спявачкі Таццяны Грыневіч-Матафонавай, якая пазнаёміла слухачоў са сваёй творчасцю і прэзентавала дыскі са спевамі і вершамі для школьнікаў.
Фота Алесі Дуброўскай
