13 лістапада ў будынку Беларускага тэатра «Лялька» адбылася музычна-літаратурная імпрэза, прэзентацыя дыска «Вяселле», арганізаваная вядомым музыкам Сяргеем Доўгушавым і беларускай казачніцай Аленай Масла.
Запісы, зробленыя ў 1968-1969 гадах пісьменнікам Сяргеем Панізнікам у ваколіцах Лявонпаля (Мёрскі раён), прагучалі ў выкананні полацкага фальклёрнага гурта «Варган». Госці з задавальненнем спявалі разам з музыкамі, танчылі і велічалі пары сужэнцаў, зычачы ўсім шчаслівага жыцця ў шлюбе.
Не забылі павіншаваць з юбілеем вельмі паважанага і знакавага чалавека – мастацкага кіраўніка тэатра «Лялька» Віктара Клімчука.
Праект быў рэалізаваны ў межах кампаніі “Пяцісотгоднасць”, якую ладзіць ГКК “Будзьма беларусамі!” сумесна з Саюзам беларускіх пісьменнікаў да 500-годдзя беларускага кнігадрукавання.
Фота Вячаслава Шайнурава, Сержука Доўгушава