Беларуская інтэрнэт-радыёстанцыя Radio Plato робіць наступны крок у сваім развіцці і стварае ўласны лэйбл для публікацыі музычных рэлізаў. Мэта лэйбла — развіваць і далей умацоўваць кам’юніці музыкантаў, дыджэяў і прадзюсараў, якое гуртуецца вакол і побач Radio Plato. Канцэпцыя лэйбла не абмяжоўваецца жанравымі або геаграфічнымі каардынатамі, але будзе залежаць ад куратарскай экспертызы стваральнікаў лэйбла.
«Для нас гэта лагічны крок, пра які мы думалі каля года, — кажуць заснавальнікі Павел Кірпікаў і Аляксандр Карнейчук. — Пасля запуску медыя на Radio Plato, дзе мы распавядаем пра рэлізы беларускай (і не толькі) сцэны, заканамерна пачаць гэтыя рэлізы выпускаць».
Першая кружэлка — гэта кампіляцыя «Rajsn-elektronik: яўрэйска-беларуская электроніка», якую Radio Plato падрыхтавала ў супрацы з Цэнтрам беларуска-яўрэйскай культурнай спадчыны. Ідэя альбома — гэта пераасэнсаванне культурнай традыцыі ад сучасных беларускіх прадзюсараў, якія на аснове беларуска-яўрэйскіх песень і мелодый зрабілі актуальны, свежы матэрыял у шырокім жанравым дыяпазоне: ад эксперыментальнага эмбіента і хіп-хопа да эйсід-дыска і трайбла. Ёсць нават песня, якую хоць зараз бяры на Еўрабачанне.«Мы хацелі выйсці за межы стварэння падобных альбомаў, калі фолк ідзе побач з нэафолкам, і таму прапанавалі паўдзельнічаць тым прадзюсарам і музыкантам, якія ўвогуле ці амаль ніяк не звязаны з традыцыйнай музыкай. Мы хацелі прыўнесці яе на танцпол — атрымаўся эксперымент як для нас, так і для іх», — кажуць стваральнікі лэйбла.
У кампіляцыі ўзялі ўдзел: SK.EIN, Schmoltz, Stroppy Pie, Stereobeaver, Lipski, Gip Gipz, Rik Tomito і Ilya Gurin-Babayeu. У стварэнні архіва мелодый і напеваў дапамагалі вядомыя фалькларысты Зісл Сляповіч і Алесь Астравух. А сам альбом выходзіць у межах 2-га «Беларуска-яўрэйскага фестывалю», які пачнецца ў гэтую нядзелю, падчас Ханукі.
Альбом выйдзе 29-га лістапада і будзе даступны на Bandcamp і Soundcloud радыё, а пазней і на астатніх стрымінгавых платформах.
