У Варшаве 24 лістапада адкрыўся штогадовы Гістарычны кніжны кірмаш. Сёлета там працуе беларускі стэнд, які аб’яднаў 13 выдавецтваў і выдаўцоў. На стэндзе выступяць вядомыя культурніцкія дзеячы.
З 24 лістапада ў Варшаве праходзіць Гістарычны кніжны кірмаш. Сёлета ён адбываецца ўжо трыццаты раз. Арганізатарамі працы беларускага стэнда сталі Цэнтр беларускай салідарнасці, выдавецтвы «Эканомпрэс», «Галіяфы», «Харвест», «Медысонт», «Папуры», «Пазітыў-цэнтр», «Тэхналогія», выдаўцы Раман Цымбераў, Аляксей Вараксін, Андрэй Янушкевіч, Зміцер Колас і іншыя.
Каб знайсці беларускі стэнд, трэба ад галоўнага ўваходу на кірмаш павярнуць налева і прайсці да канца выставачнай прасторы.
На стэндзе можна набыць новыя і даўнейшыя беларускія выданні: кнігі, часопісы «Наша гісторыя» і «Arche».
Ёсць некалькі календароў на 2023 год ад розных выдаўцоў.
Кірмаш прапануе вялікую культурніцкую праграму. На беларускім стэндзе пройдуць сустрэчы з Віктарам Ляхарам, Сяргееем Тарасавым, Ганнай Янкутай, Ігарам Крэбсам, Настай Кудасавай, Святланай Дземідовіч, Святланай Курс. Каманда фестывалю інтэлектуальнай кнігі «Pradmova» прэзентуе новы конкурс беларускамоўных рукапісаў. Падрабязней аб праграме і выступоўцах — тут.
Акрамя польскіх і беларускіх выдавецтваў, на кірмашы прадстаўлены таксама ўкраінскія.
Гістарычны кніжны кірмаш працуе да 27 лістапада ў аркадах Кубліцкага Каралеўскага замка (Варшава, plac Zamkowy 4). Уваход вольны.
Да канца месяца можна наведаць задарма таксама музейную экспазіцыю Каралеўскага замка (праходзіць акцыя «Лістапад-2022 задарма ў каралеўскіх рэзідэнцыях», якая дзейнічае і для палаца ў варшаўскім Віланове, замкаў у Кракаве, Любліне, Познані, Мальбарку, Штуме, Квідзыне, Сандаміры, Вялічцы).
У варшаўскім Каралеўскім замку можна пабачыць, напрыклад, арыгінал Канстытуцыі 3 мая 1791 г., пакоі і трон апошняга караля Рэчы Паспалітай Станіслава Аўгуста Панятоўскага, які, нагадаем, нарадзіўся ў Воўчыне (цяпер Камянецкі раён Брэсцкай вобласці). У замку захоўваецца урна з сэрцам Тадэвуша Касцюшкі (яго забальзамаванае цела пахавана ў крыпце касцёла Вавельскага замка ў Кракаве, побач з магіламі польскіх каралёў).
Фота аўтаркі
Алена Ляшкевіч, budzma.org
