Няма жадання глядзець «традыцыйнае» з экранаў беларускага (ды й расейскага) ТБ? Зрабілі падборку святочных беларускіх праграм пад Новы год.
Незалежны беларускі навагодні YouTube не сказаць, каб надта разнастайны сёлета, але выбраць штосьці пад настрой можна. Не забывайце пра бяспеку — некаторыя беларускія каналы з гайду прызнаныя ў самой Беларусі экстрэмісцкімі.
Навагодняя ноч на «Белсаце»
Самае маштабнае шоў застаецца за тэлебачаннем — Навагодняя ноч на «Белсаце» Каманда тэлеканала абяцае «неверагодна цёплую і душэўную праграму навагодняга вечара».
Пачынаецца святочны вечар а 19-й з падсумаванняў у інфармацыйных перадачах «Вот так», «Аб’ектыў» і «Белсат Зум».
Далей — «Шчыра кажучы», спецыяльнае выданне «Вусоў Скарыны» і святочнае «Хай Так ТВ». Святочны канцэрт пачнецца ў 22:50. Беларусаў павіншуюць Лявон Вольскі, Дзяніс Дудзінскі, спявачка KETEVAN, гурты J: MORS і «Разбітае сэрца пацана», а яшчэ абяцаюць загадкавых таемных гасцей.
Ужо ў новым 2025 годзе свята працягнуць «Мова нанова» і «Музычнае папуры».
Навагодняе ад «Годна»
Каманда беларускіх экспертаў і экспертак у пытаннях беларускай нацыянальнай ідэнтычнасці «Годна» прапануе навагодні выпуск с беларускай музыкай, цікавымі размовамі, крутымі гасцямі і яркай вядоўцай Лізай Ветравай.
«Разам мы зробім гэты Новы год па-сапраўднаму асаблівым», — кажуць у кампаніі. Пачатак 31 снежня а 19-й.
Навагодняя серыя ад «Звычайнага ранку»
Канал «Звычайны ранак» ці «Обычное утро» запусціў навагоднія эфіры з 27 снежня. Канстанцін Каверын і Марына Ментусава сустракалі палітыкаў, музыкаў, акцёраў ды ўвогуле вядомых персон у навагодніх дэкарацыях і настроі. Часам нават з беларускай мовай. Напрыклад:
31 снежня на канале абяцаюць зборнае відэа з песнямі з навагодніх эфіраў.
«Маланка медыя» прапануе танцы з «Бі-2»
Каманда «Маланкі» падрыхтавала навагодні стрым у ноч з 31 снежня на 1 студзеня. Абяцаюць найлепшыя хіты гурта «Бі-2», віншаванні ад музыкаў і сюрпрызы.
Пачатак стрыму — 31 снежня а 23-й.
Навагоднія «Гутаркі» з Ідракам Мірзалізадэ і Міхасём Ільіным
Сёлета ў Варшаве адкрыўся Беларускі стэндап-клуб, дзе адно з шоу — «Гутаркі» — выходзіць на беларускай мове. Стэндаперы Ідрак Мірзалізадэ і Міхась Ільін размаўляюць паміж сабой і з гледачамі на розныя актуальныя тэмы.
31 снежня комікі падрыхтавалі адмысловы выпуск.
У 23:48 да беларусаў звернецца Святлана Ціханоўская
Лідарка беларускіх дэмакратычных сіл у сваім тэлеграм-канале паведаміла, што сёлетняе навагодняе віншаванне будзе моцна адрознівацца ад усіх, што раней бачылі беларусы:
«Дзякуй усім беларусам, хто далучыўся да здымак. Вы браліся ўдзельнічаць сем’ямі, з дзеткамі і стварылі такую шчырую, цёплую атмасферу, што яна адчуваецца ў кожным кадры. Было прыемна бачыць знаёмых людзей — тых, хто ўвесь гэты час крочыць поруч і штодзённа ўкладаецца ў тое, каб мы як мага хутчэй вярнуліся дамоў».
Святлана Ціханоўская на здымках звароту
Нагадаем, што летась беларускія ўлады блакавалі інтэрнэт якраз перад зваротам Святланы Ціханоўскай да беларускага народа. Не выключана, што так будзе і гэтым разам.
Цікавае і пазнавальнае
У вольныя святочныя вечары можна бавіць час не толькі гучным і стракатым. Хочаце чагосьці таямнічага, цікавага альбо нават адукацыйнага, то можна звярнуцца па веды да відэапраектаў «Будзьма беларусамі!». Гэта можа быць, прыкладам, гістарычныя серыялы «Трызуб і Пагоня» ці «Сармат».
Надакучыла глядзець і хочацца проста паслухаць цікавага? То вось падборка найлепшых падкастаў па гісторыі Беларусі — ад дасціпных размоваў пра шляхецкі побыт да вострых дыскусій пра Вялікае Княства Літоўскае.
Калядны плэй-ліст ад «Будзьма»
Склалі для вас плэй-ліст беларускіх калядных песень разнастайных выканаўцаў. Слухайце і натхняйцеся святочным настроем.
Зрабілі 2 падборкі: на ютубе і на spotify. Варта слухаць і там, і там, бо не ўсё ёсць на абодвух сэрвісах.
Budzma.org
