Жонка экс-старшыні Вярхоўнага Савета Беларусі Станіслава Шушкевіча распавяла «Народнай Волі», як яе муж патрапіў у рэанімацыйнае аддзяленне лечкамісіі ў Ждановічах.
Днямі з’явілася інфармацыя, што першы кіраўнік незалежнай Беларусі патрапіў у рэанімацыю пасля перанесенай хваробы на каранавірус. Мы пацікавіліся ў Ірыны, жонкі Станіслава Станіслававіча, як ён зараз сябе пачувае.
— Акурат сёння яго выпісалі з бальніцы, — распавядае Ірына. — Муж яшчэ даволі слабы, як кажуць, ляжачы хворы. Зараз яму патрэбна сацыяльная рэабілітацыя. Хаця, безумоўна, пасля бальніцы яго стан палепшыўся.
— Ведаю, што Станіслаў Станіслававіч вельмі засцерагаўся, каб не захварэць на кавід...
— Так, у мінулым годзе, калі было цёпла, увесь час сядзеў на лецішчы. Пасля таго, як прыехаў у Мінск, таксама на вуліцу практычна не выходзіў. Нават не ведаю, дзе ён мог падчапіць гэтую хваробу.
— А ўвогуле, ці скардзіўся апошнім часам на здароўе?
— З нагамі былі праблемы, таму без кіёчка не хадзіў. А напрыканцы лютага захварэў на каранавірус. Была тэмпература, прыйшоў ўрач. Пазней стала горш, выклікалі «Хуткую», забралі ў бальніцу.
Затым муж вярнуўся дадому, а прыкладна тыдзень таму ізноў стаў дрэнна сябе адчуваць — тэмпература, вялікая слабасць, нічога не еў. І ў мінулы панядзелак я вырашыла ізноў выклікаць «Хуткую». Адразу паклалі ў рэанімацыю, хаця не падключалі да апарата штучнай вентыляцыі лёгкіх. Зараз, дзякуй Богу, ізноў дома, будзем спадзявацца на лепшае...
«Народная Воля»
