Карп — рыба, якую лавілі і елі круглы год нашыя продкі. Самы просты варыянт прыгатавання карпа — пасмажыць. Мы прапануем падаць карпа пад смятанна-часночным соусам. Калі любіце рыбу, зрабіце сабе такую страву на абед ці вячэру — і абавязкова зноў захочаце пакаштаваць гэты просты старадаўні ласунак.
Карпа лавілі і елі спрадвеку
У беларускіх вадаёмах карпа здабывалі нашыя продкі спрадвеку, а ўжо на пачатку ХІІІ стагоддзя карпаў нават сталі адмыслова разводзіць. Карпа любілі есці і заможныя людзі, і простыя. Быў нават выведзены адмысловы від карпа — каралеўскі, ці люстэркавы.
Розніца паміж звычайным карпам і каралеўскім у будове і колькасці лускі. У каралеўскага карпа луска нашмат буйней і размешчана на спіне і баках усяго ў некалькі шэрагах, што палягчае працэс чысткі і трыбушэння рыбы.
Смажаны карп — смачная страва, якая карысталася ў кухні нашых продкаў выключнай папулярнасцю. Яго падавалі і на святочны стол, і елі ў звычайныя дні, маглі ўжываць у пост. Раней да карпа падавалі смажаную цыбулю, хрэн, або тушаную капусту з грыбамі, асабліва ўвосень такі гарнір карыстаўся папулярнасцю.
Чытайце яшчэ: Печаны карп на бульбяной падушцы — страва для каляднага стала
Як правільна пасмажыць карпа
Вычышчанага карпа нарэзаць на порцыі, або зрабіць надрэзы на рыбіне, калі асобіна не надта вялікая, як у нас. Расцерці ў ступе прынады, больш за ўсё пасуе сумесь перцаў з каляндрай і соллю. Рыбу нацерці прынадай, лепш даць прамарынавацца рыбе каля 30 хвілін. Нацерці мукой, выкласці на патэльню і абсмажыць з абодвух бакоў да залацістага колеру. Потым рыбу варта паставіць у духоўку ці печ пры тэмпературы 150 градусаў на 20 хвілін. За 10 хвілін да гатоўнасці у якасці гарніру можна выкласці на патэльню цыбулю, нарэзаную кольцамі.
Пры смажанні не варта шкадаваць алею, паколькі паніраваная рыба, смажаная ў невялікай колькасці алею, моцна падгарае, губляючы пяшчотны і тонкі смак.
Згатуем соус — у смятану нацерці крыху часнаку і дадаць насечаны кроп, перамяшаць і лепш даць настаяцца каля 20–30 хвілін. Гатовую рыбу змазаць соусам, а як дадатак да карпа пад такім соусам і печанай цыбуляй вельмі пасуюць грэнкі з белага хлеба. Іх варта падсмажыць да залацістай скарыначкі на малой колькасці алею ці масла і для пікантнасці нацерці зубчыкам часнаку пры жаданні.
На порцыю ў 800 грамаў нам спатрэбяцца:
Карп — 700 грамаў
Цыбуля — 150 грамаў
Мука — 100 грамаў
Алей — 40 мілілітраў
Часнок — 4 зубчыкі
Смятана — дзве сталовыя лыжкі
Пук кропу
Перац і соль — па смаку
Калі вам падабаюцца нашыя відэапраекты і аўтарскія артыкулы, вы можаце падтрымаць рэдакцыю «Будзьмы», набыўшы нам кубачак кавы. Гэта дапаможа нам стварыць больш цікавых відэаролікаў і арыгінальных артыкулаў.
