Кніга ўяўляе сабой летапіс роду праз прызму ўспамінаў і гісторыі паўсядзённасці, спалучэнне мастацкай літаратуры і гістарычнага даследавання. 

«Твор, што задумваўся як кніга сямейнай гісторыі, і спалучыў мемуарную, мастацкую, краязнаўчую і архіўна-гістарычную часткі, у выніку стаўся кнігай пра Беларусь, а больш дакладна пра Вялейска-Мядзельска-Маладзечанскія ваколіцы. Пра тое, як яны перажылі Першую і Другую сусветныя войны, як жылі за Польшчай і Саветамі, як калектывізаваліся і раскулачваліся, як высяляліся і вярталіся дамоў», — прыводзіць цытату «Суполка беларускіх пісьменнікаў».

«Праца над кнігай ішла доўгія тры гады, а падрыхтоўчы этап заняў усе пяць. Над кнігай працаваў бацька, збіраючы па драбніцах матэрыялы і нястомна распытваючы жывога ўдзельніка падзей свайго тату (майго дзеда Анатоля), які стаў асноўным апавядальнікам вуснай гісторыі сям’і; шчыраваў брат Анатоль, які здзейсніў тытанічную працу па генеалагічных росшуках у архівах і стаў суаўтарам кнігі і аўтарам гістарычнага раздзела нашага опуса», — распавядае пра стварэнне кнігі Усевалад Сцебурака на сваёй старонцы ў фэйсбуку.

Аўтар піша пра адрозненне кнігі ад падобных ёй. У «Сцебуракавым лёсе» надзелена шмат увагі малавядомым старонкам жыцця высыльных беларусаў у Сярэдняй Азіі — ад пагрузкі кулакоў у апошнія эшалоны ў пачатку 1950-х да вяртання ў Беларусь у 1970-я.

Кніга ахоплівае перыяд у некалькі стагоддзяў. Утрымлівае змястоўны ілюстрацыйны і фотаматэрыял. Аўтары анансуюць шмат цікавостак і невялікіх адкрыццяў, што прывабяць краязнаўцаў, аматараў гісторыі паўсядзённасці і мемуарнай літаратуры.

Навінку ўжо можна набыць у «Акадэмкнізе» ці замовіць на сайце Knihi.by.