Гэтымі перадсвяточнымі днямі мы не губляем духу Калядаў і прыгадваем віншаванні і паштоўкі ад кампаніі “Будзьма беларусамі!” за мінулыя гады.

2014

Інтэрактыўная паштоўка  з магчымасцю даведацца назвы прадметаў, выяўленых на паштоўцы, адным клікам заклікала правесьці 2015-ты год разам з вясёлай Казой. Ці то – з нашай каляднай Казой, ці то – з Казой з кітайскага календара, сімвалам году.

2013

Капітан Культура спрабаваў прымірыць святога Міколу і Дзеда Мароза (а яшчэ – Каляды і Раство), жартоўна тлумачачы станоўчы бок такой культурніцкай асаблівасці Беларусі пэўным жыццёвым прагматызмам.

2012

Анімаваная паштоўка тлумачыла снегавіку з соцпакетам, як быць вясёлым і не губляць беларускі код. А ўсё проста: трэба памятаць пра  беларускую культуру!

2011

Відэа-віншаванне “Верыць і не здавацца” заклікала не губляць аптымізму, заўжды знаходзіць выйсце і… паказвала, як адсканаваць хамячка. Хоць падчас здымак ніхто не пацярпеў, па-ранейшаму просім не паўтараць эксперымент самастойна!

А яшчэ ў той год мы дарылі кожнаму яйка цмока. Кажуць, цмокі, якія павырасталі ў той год, прыносілі сваім гаспадарам золата і іншыя каштоўныя рэчы.

2010

Акцыя “Будзьма з беларускімі святамі!“, якая пасля ўвасобілася ў серыі прыгожых паштовак, нагадвала не толькі пра Каляды, а яшчэ і пра такія святы, як Юр’я, Русалле, Куст ды многія іншыя.

2009

Паштоўка ад Міхала Анемпадыстава дэманстравала святочнае адзінства снегавікоў, жадаючы вясёлых Калядаў і шчаслівага Новага году.

2008

А першыя паштоўкі ад маладой кампаніі “Будзьма беларусамі!” зычылі вясёлых святаў.