0 лютага на офісе Аб’яднанай грамадзянскай партыі ў Бабруйску адбылася творчая сустрэча з мінскімі творцамі – бардам Таццянай Беланогай і паэтам Усеваладам Сцебуракам.Арганізатарам імпрэзы, якую наведалі каля пяцідзесяці чалавек, выступіў сябар Саюза беларускіх пісьменнікаў, галоўны рэдактар ​​«Бобруйского курьера» Анатоль Санаценка.

Анатоль Санаценка прадстаўляе гасцей. Фота Віктара Масаловіча 

Адкрыў вечар Усевалад Сцебурака. Паэт коратка распавёў пра дзейнасць Саюза беларускіх пісьменнікаў, прэзентаваў яго літаратурныя выданні, а таксама сваю кнігу «Бег па самаадчуванні». Ім было прачытана некалькі вершаў з гэтага паэтычнага зборніка.

Таццяна Беланогая. Фота Віктара Масаловіча

Аўтар-выканаўца песень Таццяна Беланогая прадставіла свой ​​апошні альбом «Святло і цені», выканаўшы каля дзесяці песень. Завяршылася сустрэча песнямі з новага альбома «Белы матылёк», які будзе складацца з твораў на вершы беларускай паэткі Яўгеніі Янішчыц.

Падчас творчага вечара былі разыграны прызы ад грамадскай культурніцкай кампаніі «Будзьма беларусамі!» у межах якой адбылася сустрэча. Госці адказалі на шматлікія пытанні слухачоў. А пасля заканчэння сустрэчы – падпісалі кнігі і дыскі, сфатаграфаваліся з прыхільнікамі сваёй творчасці.

Паводле: Васіль Кулікоў, babruysk.by

Выказваем шчырую ўдзячнасць Анатолю Санаценку за прадастаўленыя матэрыялы

Прэсавая служба СБП

Тэгі: Бабруйск, Магілёўшчына