Супольны выступ паэткі Валярыны Куставай і музыкі Змітра Вайцюшкевіча зладзілі 13 траўня ў сталічнай гімназіі №75.

Прапанова арганізаваць музычна-паэтычны праект узнікла ў навучэнца, старшыні самакіравання гімназіі Максіма Мілто падчас напісання ў Мінску ІІ агульнанацыянальнай беларускай дыктоўкі. Тэкст дыктоўкі зачытвала Валярына Кустава, а Зміцер Вайцюшкевіч “адказваў” за музычную частку імпрэзы. Музыка не змог прысутнічаць у той дзень на мерапрыемстве, але ідэя пабачыць на адной сцэне двух вядомых беларускіх творцаў была падхопленая Максімам. У выніку навучэнцы сталічнай гімназіі пабачылі першы ў гісторыі супольны выступ Валярыны Куставай і Змітра Вайцюшкевіча.

Зміцер Вайцюшкевіч

Канцэрт быў прымеркаваны да правядзення ў гімназіі тыдня мастацтваў. На ім прысутнічалі вучні 6–11 класаў гімназіі, а таксама вядомыя госці, сярод якіх – паэтка Людміла Хейдарава-Паўлікава. Па словах Валярыны Куставай, дзеці асабліва жыва рэагавалі на песні Вайцюшкевіча з яго альбомаў “Цацачная крама” і “Танга з ружай”. “Вучні гімназіі – вельмі адукаваныя і абазнаныя ў беларускай літаратуры. Яны добра ведалі імёны Рыгора Барадуліна, Уладзіміра Някляева. Гэта быў напраўду добры зарад беларускасці!” – адзначыла Валярына.

Валярына Кустава
— Я не рыхтавала нічога спецыяльна. Мне сказалі, што дзеці будуць не вельмі малыя. Спадзяюся, яны ўсё зразумеюць, — зазначыла Валярына. Зміцер таксама ўпэўніў, што не падзяляе свае песні на дарослыя і дзіцячыя і не рыхтаваў спецыяльнай праграмы.

Нягледзячы на тое, што Валярына Кустава і Зміцер Вайцюшкевіч упершыню ладзілі сумесны канцэрт, абодва выступоўцы прызналіся, што ён прайшоў надзвычай удала. “Гэта былі не проста два асобныя выступы. Паміж мной і Змітром атрымаўся сапраўдны дыялог. Да таго ж, гэта была вельмі добрая магчымасць для нас проста паслухаць адно аднаго”, – адзначыла Валярына Кустава. Паэтка таксама паведаміла, што ў іх з’явіліся ідэі і перспектывы і далей ладзіць сумесныя творчыя сустрэчы.

Зміцер Вайцюшкевіч звярнуўся да вучняў гімназіі з прапановаў вывучаць беларускую мову і карыстацца ёй:

— Шмат хто з беларусаў не ведае, як гучыць тое ці іншае слова па-беларуску. Калі вы сёння пасля канцэрту выйдзеце на вуліцу і ўбачыце якую-небудзь рэч, узгадайце, як яна гучыць па-беларуску.

Ініцыятары і арганізатары імпрэзы таксама засталіся задаволеныя яе вынікамі ды маюць намер і далей ладзіць падобныя сустрэчы з творцамі.

Пры канцы імпрэзы Зміцер і Валярына раздавалі маленькім слухачам аўтографы, і усе разам фатаграфаваліся.

Імпрэза ладзілася ў межах кампаніі “Будзьма беларусамі!”

Фотаздымкі Вікторыі Біран

для www.budzma.org

Тэгі: Мінск