У рамках праекта “У госці да кніг” у Нацыянальнай бібліятэцы Беларусі стартуе серыя заняткаў “Клуб кніжных прафесараў”. Музейныя заняткі разлічаны на дзяцей 6–12 гадоў.
“Клуб кніжных прафесараў” – надзвычай актуальная ініцыятыва напярэдадні 500-гадовага юбілею беларускага кнігадрукавання, які будзе адзначацца ў 2017 годзе. Заняткі адрасаваны тым, хто жадае быць падрыхтаваным да важнай падзеі і ісці ў нагу з часам!
“Ты чым учора займаўся? Быў у музеі кнігі? Бачыў кнігі, якім ад 100 да 500 гадоў? І ты член Клуба? Класна!”
Каб патрапіць у лік абраных, трэба тэрмінова запісацца ў зборную групу!
Серыя “Клуб кніжных прафесараў” з’яўляецца суцэльным курсам і ўключае 9 заняткаў. На працягу навучальнага года дзеці наведваюць музей кнігі Нацыянальнай бібліятэкі Беларусі кожны месяц. Праграма пачынаецца ў верасні і завяршаецца ў маі.
На занятках, якія праводзяцца ў даступнай і займальнай форме, дзеці здзейсняць вандраванне ў гісторыю кнігі, атрымаюць новыя веды пра багацце і разнастайнасць беларускай кніжнай культуры. Заняткі праводзяцца на беларускай мове і ўключаюць інтэрактыўныя экскурсіі, пазнавальныя гутаркі, майстар-класы, творчыя заданні і гульні.
Атрыманню ведаў спрыяюць незвычайная музейная атмасфера, сяброўскія ўзаемаадносіны, дзе кожнае дзіця выяўляе сябе вольна, і ў той жа час усе захоплены агульнай справай. Дзеці стануць не толькі гледачамі, якія пазіраюць на прадметы ў вітрынах, але і актыўнымі ўдзельнікамі працэсу спазнання кнігі.
Тэмы заняткаў:
- Формы і матэрыялы кнігі.
- Папяровыя цуды.
- Структура кодэкса.
- Рукапісная кніга.
- Ёган Гутэнберг.
- Францыск Скарына.
- Кніжная культура Радзівілаў.
- Мініяцюрная кніга.
- Аўтограф.
Кошт адных заняткаў: 2.50 (два рублі пяцьдзесят капеек).
Фарміраванне групы – да 20 верасня 2016 года.
Кантактная інфармацыя:
тэлефон (8 017) 293 27 82, e-mail sapega@nlb.by,
Таццяна Сапега, каардынатар праекта “У госці да кніг”.
