Алесь Тодараў дзеліцца на budzma.org эфектыўнымі методыкамі канспектавання, якія дапамагаюць быць больш арганізаваным па жыцці, а таксама засвойваць новую інфармацыю.
Крыніца: www.galacentre.ru
Існуе думка, што весці канспект — атавізм з нейкіх далёкіх часоў, калі атрыманую інфармацыю трэба было запісваць. Бо іншых варыянтаў не было. Так, нашыя бацькі, калі хадзілі на пары ў савецкія інстытуты і ўніверсітэты, запісвалі тое, што казаў настаўнік. Або рабілі выпіскі з кніжак, працуючы самастойна ў бібліятэках.
Але насамрэч наяўнасць традыцыйнага папяровага нататніка не згубіла сваіх перавагаў і цяпер, калі поўна самых розных праграм для нашых смартфонаў, планшэтаў і камп’ютараў. Каб пераканацца ў тым, дастаткова толькі паспрабаваць — завесці сабе невялікі «натхняльнік», каб запісваць там свае думкі.
Рэч у тым, што папера надае думкам, якімі вы спрабуеце падзяліцца, пэўную структуру. Просты прыклад: паспрабуйце коратка занатаваць увечары свой прамінулы дзень. Зрабіце тое раз, два, дзесяць — з часам убачыце, што сталі лепей запамінаць нават складаную інфармацыю. У часе пісьма на паперы нібыта само па сабе ўключаецца крытычнае мысленне, а таксама развіваюцца аналітычныя здольнасці. Хаця б мінімальна, але ж...
Перавагі штодзённіка:
1. Запісаць заўсёды хутчэй, чым запомніць. Напрыклад, запісаць нумар мабільнага тэлефона ў шмат разоў лягчэй і хутчэй, чым запомніць. Тое самае і са справамі.
2. Эканомія энергіі. Каб не забыцца нешта важнае, мы часта ставім на руцэ крыжык ці спрабуем нейкім іншым чынам запомніць неабходнае. А потым з цяжкасцю ўзгадваем — на гэта траціцца энергія. Нататнік здымае такую праблему.
3. Надзейнасць. Любую, нават самую важную справу, можна забыць. Праз стомленасць, эмоцыі, вал іншых спраў або абставіны. Але калі задачы запісаць і распісаць, то забыцца на іх будзе куды складаней.
Імкніцеся запісваць свае ідэі
Крыніца: blog.wikium.ru
Не спрабуйце запамінаць усе ідэі, што прыходзяць вам у галаву, лепш запісвайце іх. Бо як доўга трымаецца тая ідэя пасля таго, як узнікла? Хвіліну, дзве, тры? У любым разе гэта будзе зусім невялікі час. А ідэя, нават калі яна падаецца самай вар’яцкай, вартая таго, каб быць запісанай.
Каб не губляць тое, што прынята называць illumination, у сэнсе «азарэнне», завядзіце сабе адну карысную звычку — запісваць свае думкі. Вам можа падавацца, што далёка не ўсе вашыя ідэі каштуюць таго, каб марнаваць на іх паперу і час, але гэта не так.
Паспяховыя людзі імкнуцца запісваць усё. Наш розум — недастаткова надзейнае сховішча, і нават самыя крутыя задумы там доўга не затрымліваюцца. Таму запісвайце кожную ідэйку, якая мае нават мінімальныя шанцы на ўвасабленне. Бо хто ведае, мо прыйдзе час, калі і яна спатрэбіцца.
Магчыма, вы не паверыце, але многія вядомыя мысляры мінулага, пісьменнікі, драматургі ды проста людзі пісьмовай культуры так і рабілі. Вялі кароткія нататкі, з якіх потым паўставалі вялікія навуковыя артыкулы ці непераўзыдзеныя помнікі літаратуры. Некаторыя творы наогул так і былі створаныя — пісаліся на картках, абрыўках паперы, сурвэтках. І ўжо потым зводзіліся да аднаго цэласнага матэрыялу.
Акрамя таго, вядзенне запісаў дапамагае засяродзіцца, нагадваючы вам, над чым вы працуеце ў дадзены момант і да чаго імкнецеся.
Што можна рабіць з дапамогай нататніка?
Многія праграмы і дадаткі, якія створаны ў выглядзе нататніка, не змогуць прынесці вам тыя ж эмоцыі, што і рэальны штодзённік.
Вядзенне нататніка выдатна дапамагае развіваць крэатыўнае мысленне і творчы падыход да рэчаў. Вось некалькі спосабаў, якімі можна выкарыстоўваць нататнік:
Журнал трэніровак
Вы можаце фіксаваць свае мэты па здароўі, трэніроўках, харчаванні і ўсякіх іншых фізічных нагрузках, робячы нешта кшталту чэк-лістоў або табліц.
Калі наведваеце спартыўную залю, звярніце ўвагу: многія трэнеры і цяпер карыстаюцца менавіта папяровымі нататнікамі, куды запісваюць дасягненні сваіх кліентаў. Ну і свае ўласныя, вядома.
Кантраляваць час
Крыніца: mangogames.ru
З дапамогай нататніка вы таксама можаце адсочваць свой час, які траціце на істотныя і неістотныя справы. Каб правільна выбудаваць прыярытэты. Не заўжды зразумела, што варта рабіць у першую чаргу, а што потым, і колькі часу займае, здавалася б, нязначная справа.
Адсочваць выдаткі
Гэта добры пункцік, які толькі на першы погляд падаецца бессэнсоўным. Бо разумець і кантраляваць свае выдаткі — вельмі добрая звычка. Рэч у тым, што мы жывем у час грамадства спажывання, калі рэклама вакол так і вабіць. І многае каштуе не так і многа, што ў выніку абарочваецца вялікімі «дзіркамі» ў бюджэце.
Просты прыклад: ці не кожны можа зараз дазволіць сабе ўзяць ранкам кубак кавы, ідучы на працу ў офіс. Грошы, здавалася б, не такія і вялікія. Але калі памножыць кошт аднаго кубка на ўсе працоўныя дні месяца, то атрымаецца даволі істотная сума. Але ж гаворка, натуральна, не толькі аб ранішняй каве...
Запісваць падзякі
Шмат хто кажа, што сардэчная падзяка — гэта і ёсць сапраўдны ключ да поспеху. Для тых, хто так і не навучыўся дзякаваць сабе, жыццю, іншым, вядзенне падобнага нататніка можа быць выйсцем.
Бо ўменне быць за ўсё ўдзячным — гэта адназначная прыкмета паспяховага чалавека.
Плёну!
Алесь Тодараў, budzma.org
