4 мая прадстаўнікі баскетбольнага клуба “Цмокі-Мінск” у асобах гульца асноўнай каманды Аляксандра КУДРАЎЦАВА і дырэктара дэпартамента эканамічнага развіцця і спартыўнага маркетынгу Аляксандра КУЛЯ наведалі Цэнтр здаровай моладзі, у якім знаходзяцца маладыя людзі, што пакутуюць ад наркатычнай і алкагольнай залежнасці.
Вялікі дом каля Аксакаўшчыны змяшчае некалькі дзесяткаў моцных духам людзей, што мараць пазбавіцца ад згубных звычак.
Мерапрыемства праходзіла ў форме свабоднай размовы, аднак пачалося ўсё з традыцыйнай для дадзенага месца цырымоніі прадстаўлення: кожны з удзельнікаў прадставіўся і распавёў пра сваю гісторыю. Варта адзначыць, што кантынгент вельмі разнастайны: маладыя хлопцы, дзяўчаты, мужчыны, з вышэйшай адукацыяй і без яе, ёсць тыя, хто трымаецца некалькі месяцаў, а ёсць валанцёры, якія не ўжываюць наркотыкі ўжо больш 10 гадоў.
Першапачатковая сарамлівасць хутка змянілася зацікаўленасцю. Маладыя людзі атрымалі ад баскетбалістаў адказы на пытанні аб правільным харчаванні, пераадольванні праблем, стрымліванні сваіх эмоцый.
Спартсмены распавялі пра тое, як знайсці сябе пасля завяршэння кар’еры прафесійнага гульца, пра спорт, як крыніцу задавальнення.
Цікаўныя вочы маладых людзей сталі лепшай падзякай баскетбалістам за адкрытую гутарку. Канчаткова вынікі мерапрыемства падвялі ўручэнне маек ад клуба, а таксама аўтограф- і фотасэсія.
“Спадзяюся, што хлопцы і дзяўчаты, якія праходзяць курс рэабілітацыі ў цэнтры, пасля сустрэчы, атрымалі дадатковую матывацыю не толькі паспяхова скончыць курс, але і ў далейшым ніколі не вяртацца да згубных звычак, – адзначае Аляксандр Куль, – мы жадаем ім вярнуцца ў рэабілітацыйны цэнтр толькі ў якасці валанцёраў і супрацоўнікаў, якія сваім прыкладам могуць паказаць новапрыбылым, што жаданне жыць паўнавартасным жыццём можа стаць рэальнасцю, дзякуючы самадысцыпліне, узаемадапамозе і падтрымцы!
Дарэчы, усе работнікі цэнтра – былыя нарказалежныя асобы, якія змаглі перамагчы сябе і адмовіцца ад сваіх звычак, цяпер ягы дапамагаюць вярнуцца да нармальнага жыцця ўсім, хто жадае і гатовы прыняць дапамогу.
Я пазнаёміўся з людзьмі, якія ў сваім імкненні вярнуцца да паўнавартаснай сацыяльнай ролі ў грамадстве і весці здаровы лад жыцця паказваюць прыклад барацьбы і магчымасці перамагчы самага моцнага суперніка – самога сябе! Незалежна ад таго, якія мэты ставіць перад сабой чалавек, заўсёды самае складанае гэта пераадолець сябе і пазбавіцца ад сваіх звычак, змяніць жыццё да лепшага і выйсці на больш высокі ўзровень чаго заўгодна – здаровага ладу жыцця, дабрабыту, статусу”.
Сваімі ўражаннямі ад сустрэчы дзеліцца прадстаўнік Цэнтра здаровай моладзі Арцём БУТЭР:
“Для пацыентаў рэабілітацыйнага цэнтра такія візіты рэдкасць. На жаль, не так шмат прафесійных спартсменаў наведваюць такія месцы. І тым, хто зараз праходзіць лячэнне ад нарказалежнасці, знакамітых гульцоў раней удавалася ўбачыць толькі па тэлевізары. Хлопцы з цікавасцю сустрэлі гасцей, атрымаліся жывыя і простыя зносіны. Прадстаўнікі клуба падзяліліся сваімі гісторыямі кар’еры ў спорце, стаўленнем да розных аспектаў жыцця.
Для людзей, якія праходзяць рэабілітацыю, увага вельмі важная: яны адчуваюць зацікаўленасць і неабыякавасць. Гэта зараджае іх пазітыўным вопытам і станоўчым прыкладам, якім безумоўна з’яўляюцца гульцы клуба “Цмокі-Мінск”. Гэта сустрэча, несумненна, паслужыць яшчэ адной цаглінкай у падмурку новага, цвярозага жыцця для тых, хто спрабуе яго пабудаваць.
І для прадстаўнікоў каманды, думаю, гэта быў цікавы досвед. Патрэба рабіць дабро існуе ў кожнага чалавека. Спадзяемся, што хлопцы, якія наведалі цэнтр, павезлі з сабой добрыя пачуцці ад таго, што іх прыклад змог дапамагчы ў такой важнай справе, як лячэнне залежнасці”
Уся інфармацыя пра Цэнтр здаровай моладзі: www.c-z-m.by
Калі патрэбна дапамога: +375 (29) 608 68 68 (vel)
