Мінулы тыдзень не вельмі радаваў нас веснавым цяплом. Але, па-ранейшаму, цёплымі былі сустрэчы з творчымі асобамі, арганізаваныя культурніцкай кампаніяй “Будзьма беларусамі!”.
26 сакавіка ў школках пачаліся вясновыя вакацыя. Можна адпачыць! А можна з карысцю правесьці час у бібліятэцы. Асабліва, калі туды завітаў тэатр “Лямцавая батлейка” ды перакладчыца Надзея Кандрусевіч. Ва ўтульнай зале дзіцячай бібліятэкі № 13 адбылася прэзентацыя кнігі шведскай пісьменніцы Гунілы Бэргстрэм “Суперкніга пра Біла з Болаю”, якая нядаўна з’явілася ў бібліятэцы.
Напачатку некалькі слоў пра шведскую дзіцячую літаратуру і пра складанасці перакладу вершаў распавяла Надзея Кандрусевіч – перакладчыца і ініцыятарка выдання гэтай кнігі. Потым акторкі тэатра “Лямцавая Батлейка” Вераніка Фаміна і Бэла Кавалькова тэатралізавана прадставілі першую частку СУПЕРКНІГІ. Было сумна, страшна і весела – як у жыцці. І самае галоўнае, што госці і гледачы вызначылі: усе мы розныя, але мы разам, каб падтрымліваць адзін аднаго. А найлепшы спосаб падтрымкі – абдымкі. З вялікай асалодай пад вясёлую музыку ўсе пачалі абдымацца – і кожны атрымаў медаль-налепку на памяць.
27 сакавіка гасцей прымалі Цэнтральная дзіцячая бібліятэка імя М. Астроўскага і дзіцячая бібліятэка № 17.
У Цэнтральнай бібліятэцы таленавіты перакладчык, пісьменнік, музыка Уладзь Лянкевіч знаёміў маленькіх гледачоў з вядомай усім дзецям гісторыяй пра хлопчыка, які не станавіўся дарослым…на беларускай мове! Тут адбылася прэзентацыя кнігі Дж. Бары “Пітэр Пэн” (выдавецтва “Кнігазбор”), якая выйшла ў мінулым годзе на беларускай мове.
Спадар Уладзь, перакладчык кнігі, дзяліўся са школьнікамі сваімі ўражаннямі ад працы над перакладам, распавядаў пра іншыя свае праекты, задаваў цікавыя пытанні на веданне гісторыі Пітэра Пэна. Дзеці таксама засыпалі выступоўцу пытаннямі і пра кнігу, і пра веданне моваў, і пра музыку… Сустрэча атрымалася насычанай і яркай. Падрабязней можна пачытаць тут.
А бібліятэку ў Лошыцы наведаў малады, харызматычны, таленавіты Андрусь Такінданг. Літаратурна-музычная сустрэча, прысвечаная святу 100-годдзя абвяшчэння Беларускай Народнай Рэспублікі вельмі спадабалася супрацоўнікам і гасцям бібліятэкі. Спадар Андрусь праз музыку і цікавыя пытанні нагадаў школьнікам агульную гісторыю Радзімы. Патлумачыў, што такога важнага адбылося 100 год таму і чаму мы сёння святкуем гэтую дату.
Падрабязнасці і відэа можна паглядзець тут і тут.
