Сышоў ад нас студзень, пакінуўшы смак калядных пачастункаў ды усмешкі ад цудоўных сустрэч з творчымі людзьмі, якія падарылі вам грамадская культурніцкая кампанія “Будзьма беларусамі!” і грамадскае аб’яднанне “Саюз беларускіх пісьменнікаў”.
22 студзеня ў бібліятэку №1 завіталі маленькія гледачы, каб прыняць удзел у чароўным спектаклі “Мама Му, Крумкач і Каляды”, паводле кніг шведскай пісьменніцы Юі Вісландэр. Спачатку акторкі тэатрыка “Лямцавая батлейка”, Вераніка Фаміна і Наталля Леванава правялі тэст на веданне беларускіх слоў. Пасля ўсе разам ўпрыгожвалі кароўнік, падбіралі вобраз для Мамы Му, а Крумкач зрабіў майстар-клас па пошуку падарункаў! Скончылася ўсе падарункамі – цудоўнымі паштоўкамі “З Калядамі!” ад Мамы Му і Крумкача, якія дзеткі абяцалі размаляваць дома.
26 студзеня ў бібліятэцы сярэдняй школы № 18 г. Берасця прайшоў незвычайны паэтычны беларуска-ангельскі ўрок. Правёў яго паэт, перакладчык, навуковец, сябра “саюза беларускіх пісьменнікаў” Серж Мінскевіч. Вучні самі чыталі ўслых англійскія вершы, а госць расказваў гісторыю іх напісання, знаёміў аўдыторыю са сваімі перакладамі. Напрыканцы мерапрыемства школьнікі вывучылі некалькі англійскіх песенек і іх пераклады на беларускую мову, а потым разам з госцем праспявалі. Спадар Серж ад “Будзьма беларусамі!” перадаў для бібліятэкі кнігі і часопісы.
Гэтым жа днём у Музеі-сядзібе Міхаіла Клеафаса Агінскага (Залессе, Гродзенская вобл.) адбылося адкрыццё выставы мастака з Літвы Раманаса Барысаваса, у межах якой сябра СбП Алесь Камоцкі зладзіў невялічкі канцэрт, які ад шматлікіх пажаданьняў выканаць яшчэ нешта на біс крыху зацягнуўся. Напрыканцы Раманас Барысавас абяцаў пачаць вывучаць беларускую мову па календары “Не маўчы па-беларуску”, які знакамітаму мастаку падарыла кампанія “Будзьма беларусамі!”.
27 студзеня ў Івацэвіцкай парафіі Маці Божай Жыровіцкай адбыўся выступ гурта “Балцкі Субстрат” у межах кампаніі “Будзьма беларусамі!”. Сустрэча з калектывам, на якую маглі завітаць усе цікаўныя, прайшла ў прыязнай святочнай атмасферы. Ганна і Максім, якія гэтым разам прадстаўлялі гурт у Івацэвічах, пачалі свой выступ з каляднай тэматыкі і прадставілі слухачам усе грані сваёй творчасці: ад народных песень ва ўласнай апрацоўцы да кампазіцый на словы беларускіх паэтаў. Таксама госці распавялі прысутным пра кампанію “Будзьма беларусамі!” і яе дзейнасць на ніве адраджэння беларускай культуры, пра аўтараў калектыва, сярод якіх ёсць як айчынныя класікі, так і сучасныя беларускія паэты.
З радкоў “Родная мова, цудоўная мова! Ты нашых думак уток і аснова…” (У. Дубоўка) пачалася творчая сустрэча ў ліцэі горада Барысава. 28 студзеня сюды завітала паэтэса, сябра Саюза беларускіх пісьменнікаў Вера Буланда. Навучэнцы ўважліва слухалі вершы на роднай мове:
А я – дзяўчына з Беларусі,
З калыскі мятава-духмянай,
Адтуль, дзе кола круціць бусел,
Дзе кожны – госць, даўно чаканы.
З лугоў я, з каласкоў пшанічных,
З азёраў сініх, ільняных,
Я – з песень, ад душы лірычных,
Дзядоў і прадзедаў маіх.
Я – з Мрайкі, мілай летуценкі,
З мсціжанскіх берагоў утульных,
З тваіх далоняў немаленькіх,
З ласкавых, цёплых рук матуліных.
Спадарыня Вера пазнаёміла слухачоў са сваёй кнігай “Лагода”. Вера Аляксандраўна ў сваім выступе падкрэсліла, што кніга ў жыцці кожнага чалавека – добры сябра і дарадца, а таксама найлепшае люстэрка людскога жыцця…”. На развітанне паэтэса прачытала наступныя радкі:
Як час на месцы не стаіць
І круціцца зямля ў скрусе,
Пакуль вы будзеце любіць,
Я ад сябе да вас вярнуся.
Каб толькі сонцу не астыць,
Я кожнай тканкаю малюся,
Пакуль вы будзеце любіць,
І я пад сонцам застануся.
Актыўныя ўдзельнікі сустрэчы ў падарунак ад кампаніі “Будзьма беларусамі!” атрымалі наборы святочных паштовак.
31 студзеня ў межах кампаніі “Будзьма беларусамі!” ў ліцэі № 1 г. Мінска прайшла інтэрактыўная лекцыя пра Васіля Быкава і Уладзіміра Караткевіча. Вёў яе культуролаг, сцэнарыст і выкладчык Васіль Дранько-Майсюк. Вучні даведаліся новыя нечаканыя факты пра нашых класікаў. Лекцыя была пабудавана, як інтэрактыўная гульня, то школьнікі не проста слухалі, але і актыўна ўдзельнічалі ў сустрэчы.
P.S. Калі Вы жадаеце зладзіць цікавую сустрэчу з ГКК “Будзьма беларусамі!” і ГА “Саюз беларускіх пісьменнікаў” у сваёй мясцовасці, пішыце на скрыню: [email protected] – будзем рады новым сябрам!
