Археалагічныя артэфакты папоўнілі ў 2025 годзе фонды Брэсцкага абласнога краязнаўчага музея, піша БЕЛТА.

Фота brokm.by

Археалагічны музей «Бярэсце» з’яўляецца філіялам абласнога краязнаўчага музея. Там прадэманстравалі выставу новых паступленняў. Наведвальнікі могуць убачыць дзве фібулы з бронзы. Гэтыя артэфакты былі знойдзены жыхарамі Брэсцкай вобласці.

Так, фібулу, якая, паводле ацэнак археолагаў, была выраблена ў IV-III стагоддзі да нашай эры, знайшлі каля вёскі Выгнанка Камянецкага раёна. Яна належыць да паморскай культуры. Другая рэліквія «маладзей». Гэта фрагмент фібулы, якая датуецца канцом I — пачаткам II стагоддзя. Рэліквію знайшлі недалёка ад Вялікіх Радванічаў Брэсцкага раёна. Спецыялісты мяркуюць, што яна можа адносіцца да пшэворскай або вельбарскай культур.

Фібула з’яўляецца разнавіднасцю металічнай зашпількі для адзення, якая таксама магла быць і ўпрыгожаннем. Такі прадмет гардэроба быў папулярны аж да Сярэднявечча, пакуль яго не выцеснілі гузікі. 

«Мода на фібулы мянялася дастаткова часта. Дзякуючы гэтаму яны з’яўляюцца для даследчыкаў вельмі надзейным храналагічным індыкатарам, дапамагаюць датаваць не толькі асобныя археалагічныя комплексы, але і цэлыя культуры», — растлумачылі ў Брэсцкім абласным краязнаўчым музеі.

У яго фондах налічваецца больш за 178 тыс. музейных прадметаў. Яны аб’яднаны ў 35 калекцый, якія ўсебакова раскрываюць гісторыю Брэстчыны. 

«Фонды сталі асновай для адкрыцця філіялаў — «Камянецкая вежа», «Археалагічны музей «Бярэсце», «Выратаваных мастацкіх каштоўнасцей», «Мастацкі музей». Штогод нам паступае больш за 600 музейных прадметаў. У 2025 годзе музей ужо прыняў 685. Гэта мемарыяльныя комплексы, дакументы, фатаграфіі, прадметы археалогіі, фалерыстыкі і нумізматыкі, тканіны і адзення, прадметы побыту і шмат іншага», — пералічылі ў музеі.