Знакаміты беларускі пісьменнік Уладзімір Караткевіч калісьці вучыўся ў школе № 3 у Оршы, дзе да дня народзінаў класіка зрабілі мемарыяльную дошку, піша «Новы час».

Фота з фэйсбука Віктара Лютынскага

26 лістапада — Дзень народзінаў Уладзіміра Сямёнавіча Караткевіча, класіка беларускай літаратуры і аўтара легендарных раманаў «Дзікае паляванне караля Стаха», «Чорны замак Альшанскі», «Каласы пад сярпом тваім». Пісьменнік нарадзіўся і вырас у Оршы, і да таго часу, калі Другая сусветная вайна прыйшла на Беларусь, паспеў скончыць 3 класы сярэдняй адукацыі ў школе № 3.

25 лістапада ў гэтай школе адкрылі мемарыяльную дошку ў гонар Уладзіміра Сямёнавіча, паведаміў у сваім фэйсбуку краязнаўца Віктар Лютынскі. Што праўда, чамусьці на рускай мове, але з урыўкам з беларускамоўнага верша класіка.

Як адзначаюць у каментарах да гэтай навіны, раней у школе была іншая шыльда, беларускамоўная, зробленая беларускімі мастакамі.

Яшчэ адна памятная дошка ў гонар пісьменніка ўсталяваная ў школе № 8, дзе Караткевіч працаваў настаўнікам у 1956-1958 гадах. Акрамя таго, у Оршы стаіць помнік выбітнаму беларусу — з урыўкам з яго верша і подпісам Караткевіча.

Чытайце таксама: Хто адцэнзураваў Уладзіміра Караткевіча?