Ён размясціўся ў школе «Бейс-Агарон» на вуліцы Партызанскай, паведамляе «Пінскі веснік».

Больш за пяць стагоддзяў прайшло з таго часу, як людзі Торы і Талмуда пасяліліся ў Пінску. Яны нібы здабылі тут сваю новую радзіму. Далёка ішла пагалоска аб Пінску, дзе габрэі знайшлі сабе прытулак, змаглі захаваць традыцыі і культуру, падарылі свету вядомых людзей: палітыкаў, навукоўцаў, духоўных асоб. Аднак усё абарвалася з прыходам нямецка-фашысцкіх захопнікаў, якія ўчынілі расправу над мірным насельніцтвам. Халакост — самая масавая праява генацыду на нашай зямлі. Яўрэйскага Пінска не стала. Але дагэтуль захаваліся старыя вуліцы, дамы — іх гаспадары, здаецца, толькі што кудысьці адлучыліся і хутка вернуцца. Артэфакты і гістарычныя рэканструкцыі прадстаўлены ў новым музеі, створаным пры падтрымцы Пінскай яўрэйскай абшчыны. Збор экспанатаў ішоў некалькі гадоў.

Водзіць «сцежкамі яўрэйскай гісторыі» адна са стваральнікаў экспазіцыі, вядомы ў краіне эксперт турыстычнай галіны, лаўрэат Нацыянальнага конкурсу «экскурсавод года — 2018» Таццяна Хвагіна.

Пабываць у гэтым музеі будзе пазнавальна не толькі гасцям горада, але і самім пінчукам. Пасля адкрыцця ўжо плануецца правесці некалькі экскурсій.