Камень быў пастаўлены ў жніўні 2023 года ў новым раёне, на чорнай шыльдзе — подпіс «Васіь Вітка», без літары «л», піша тэлеграм-канал «Спадчына».
Адказ Слуцкага райвыканкама
Дарэчы, спачатку ў райвыканкаме казалі, што ўсё правільна, маўляў, гэта проста ў Віткі подпіс быў такі.
Мармуровая шыльда на памятным знаку. Фота: «Слуцкі край»
Пасля аказалася, што тэкст набраны стандартным шрыфтам Mistral, які імітуе рукапісны тэкст і ніякага дачынення да подпісу пісьменніка не мае.
Сапраўдны подпіс Васіля Віткі (1964 г.) і «подпіс» з памылкай на памятным знаку, набраны шрыфтам Mistral
Васіль Вітка, сапраўднае імя Цімох Васілевіч Крысько (1911 — 1996) — беларускі літаратурны крытык, паэт, перакладчык, публіцыст, празаік, літаратурны крытык, драматург, педагог, класік беларускай дзіцячай літаратуры. У час сталінскіх рэпрэсій, у 1937 годзе быў выключаны з камсамола і выгнаны з рэдакцыі «Чырвонай змены» за страту пільнасці і лібералізм.
Лаўрэат Дзяржаўнай прэміі БССР (1972) за кнігі «Беларуская калыханка», «Казкі» і «Чытанка-маляванка». У 1978 узнагароджаны дыпломам Міжнароднага журы па прэміях Х. К. Андэрсена (1978) з занясеннем прозвішча пісьменніка ў Ганаровы спіс дацкага казачніка.
Родны дзед журналісткі, культуролага і ўдавы заснавальніка TUT.BY Юрыя Зісера Юліі Чарняўскай.
Фота са старонкі ў Фэйсбуку дачкі Юліі Жэні Чарняўскай
Паводле ўспамінаў Юліі Чарняўскай, пасля рэферэндуму 1995 года аб змяненні дзяржаўнай сімволікі Вітка напісаў да гэтай падзеі верш, пасля якога яго імгненна перасталі друкаваць, а пасля смерці на могілках раптам не стала месца для яго пахавання. Беларускае тэлебачанне не сказала ні слова пра смерць заслужанага дзеяча культуры, не ўдалося таксама дамагчыся мемарыяльнай дошкі на яго доме.
