У артыста Улада Prastora Рубанава выйшаў новы рэліз пра тое жывое, што ёсць у кожным і кожнай з нас, пра святло любові і свабоду ад ацэнкі ў хаатычным свеце культу розуму. 

«Жывое» пачынаецца з металёвага гучання кампазіцыі «Калі-юга» (сінонім эпохі заняпаду). У ёй музыка дазваляе сабе агрэсію і крытыкуе капіталістычны парадак свету, у якім важнейшымі за чалавека сталі лічбы — колькасць праглядаў і грошы, гаворыцца ў прэс-рэлізе.

«Ці зможа цябе сагрэць гэтая папера? Хіба што проста згарэць», — рэфлексуе Prastora і заклікае слухачоў да кааперацыі замест канкурэнцыі. Бо салідарнасць — гэта тое, што можа падтрымліваць нас не толькі ў моманты крызісаў, але і ў паўсядзённасці.

Астатнія шэсць песен — шлях ад унутранай цемры да святла. Музыка запрашае да сумеснай медытацыі. Трэк «Дзеці» нагадае: «Твой шлях не патрабуе дадатковай рэдактуры», досыць проста верыць у тое, што любіш. Напачатку гэта можа быць няпростым, але калі ёсць моцны ўнутраны намер, страхі і перашкоды сыходзяць на задні план. Галоўнае — быць шчырым, бо «музыка без любові — гукаў набор», спявае артыст у кампазіцыі «Лотас».

«Жывое» — гуманістычны альбом. Цэнтральнае месца ў рэлізе займае трэк «Чалавек». У ім музыка прымае сваю чалавечую прыроду і дае сабе права на памылкі, усведамляючы, што ў досведу няма знаку, а ўсе «добра і дрэнна» сканструяваныя розумам. Філасофская «Выспа бяспекі», эстэцкае «Цудоўнае», а таксама фэнтэзійны «Чалавек-таверна» — чарговае прызнанне ў любові людзям, творчасці, сусвету і прыгажосці, якая навокал нас.

Новы альбом Prastora дапамагае вярнуць адчуванне гульні, перастаць быць звышсур’ёзным, дазволіць сабе складаныя эмоцыі і ўсвядоміць сябе як чалавека, а не як ідэю. Бо ў рэшце рэшт гэта і ёсць тое жывое ўнутры нас, на што мы, на жаль, часам забываемся, гаворыцца ў прэс-рэлізе.

Улад Рубанаў — новы голас беларускай андэграўнднай сцэны. Музычную кар’еру ён пачаў у 2025 годзе — і ўжо паспеў выпусціць міні-альбом «Так таму і быць», лонгплэй «Зямлянін у халодным космасе», а таксама тры сінглы — «Голы», «Сакрэты з-пад коўдры» і «Філасофія».

Улад не толькі музыка, але і журналіст, дызайнер, калажыст і рэжысёр. Працаваў з выданнямі «Новы Час», KYKY, «Еўрарадыё». У 2021-м быў вымушаны з’ехаць з Беларусі, пачатак поўнамаштабнага ўварвання сустрэў у Кіеве, пасля пераехаў у Варшаву, дзе цяпер жыве з коткай і жонкай. Апошнюю можна пачуць на прыпеве ў трэку «Дзеці» з новага альбому Prastora.