Алесь Тодараў разбіраецца на budzma.by з тым, чаму многія дарослыя людзі ўсё яшчэ няўпэўненыя ў сабе і знаходзіць шэсць ключавых прычынаў такога стану.
1. Жаданне заўсёды быць правым
Па вялікім рахунку ўсім навокал ўсё роўна, што ты насамрэч думаеш, нават калі ты стоадсоткава правы. Рэч у тым, што ў гэтым свеце праўда ў кожнага свая. Кожны мае права на сваё меркаванне, тым больш, калі яно падмацавана ўласным жыццёвым досведам.
Да ўсяго, быць ва ўсім правым — не з’яўляецца якасцю ўпэўненага ў сабе чалавека. Гэта толькі паказвае, наколькі вы ўсё яшчэ няспелы і няўпэўнены ў сабе чалавек. Упэўнены ў сабе чалавек не стане даводзіць гвалтам сваю праўду. Больш за тое, ён не пабаіцца прызнаць сваю памылку.
2. Уцягнутасць у непатрэбныя драмы
Ва ўсіх ў акружэнні ёсць хаця б адзін чалавек (або парачка), якому падабаецца ўвязвацца ў канфлікты без дай прычыны. Такія людзі заўсёды павінны нешта сказаць, абавязкова ўставіць сваю рэпліку, а яшчэ лепей з апломбам эксперта штосьці даказаць. Яны гатовыя пайсці на ўсё, каб стварыць або ўлезці ва ўжо дзеючы канфлікт, нават калі гэта часам неразумнае рашэнне. Праз такія эмацыйныя крокі яны часам губляюць свае пазіцыі ў грамадстве, а таксама давер сяброў і знаёмых.
Не будзьце такім чалавекам. Трымайцеся як мага далей ад любых магчымых непрыемнасцяў, якія наўпрост незвязаныя з вамі асабіста. А замест таго, каб злавацца, пасрабуйце часцей дараваць.
3. Вы шукаеце адабрэння ў іншых
Вы ніколі не павінны дазваляць камусьці іншаму вызначаць, хто вы ёсць. Адзінае меркаванне, якое для вас павінна мець ключавое значэнне, — гэта ваша ўласнае.
Не трэба таксама ствараць сабе куміраў. Безумоўна, прыслухоўвацца або браць прыклад з больш паспяховых і таленавітых людзей варта. Але рабіць з іх жыцця краевугольны камень — дакладна не.
4. Вы шкадуеце сябе
Замест таго, каб пытаць сябе «чаму я?», абвінавачваючы ўвесь свет у сваіх праблемах, пачніце глядзець на карціну шырэй. Калі вы ўвесь час праходзіце праз адныя і тыя ж праблемы зноў і зноў, настаў час прыняць іх і чамусьці ад іх навучыцца.
У ідэале кожную праблему, якая сустракаецца на жыццёвым шляху, варта прымаць як выклік. Так робяць паспяховыя і ўплывовыя людзі гэтага свету. Вы без праблем адшукаеце такі падыход у іх гутарках, бо без цяжкасцяў не бывае сапраўднага развіцця. Так было ва ўсе часы.
Паверце, празмерны жаль да сябе — гэта шлях у нікуды. З такім падыходам вы ніколі і нічога не даб’ецеся ў гэтым жыцці.
5. Няўдачы вас бянтэжаць
Няўдачы не павінны бянтэжыць вас, а матываваць працягваць рухацца наперад. Ад няўдач, не застрахаваны ніхто. Акрамя таго, гэта не няўдачы перашкаджаюць вам дасягнуць сваіх мэтаў, а страх. Памятайце пра гэта!
6. Вы пазбягаеце пераменаў
Не бойцеся пераменаў, якімі б нечаканымі і цяжкімі яны ні былі. Перамены, нават самыя малыя і ледзьзаўважныя, з’яўляюцца прыступкамі да новага жыцця. Вашага жыцця! Не дазваляйце страху перашкодзіць вам прыняць якое-небудзь рашэнне. Вы народжаныя не для таго, каб заставацца ранейшым. Вы народжаныя, каб развівацца!
Алесь Тодараў, budzma.by
