У паэткі і спявачкі Кацярыны Ваданосавай выявілі анкалагічнае захворванне — рак грудзей. Дыягназ паставілі за мяжой. Пра гэта яна напісала ў сваім Instagram.
«Пачынаю новае змаганне»
«...Як змагарка са стажам, пачынаю новае змаганне. На гэты раз, праўда, індывідуальнае, з дапамогай дактароў.
Вельмі хочацца ўбачыць, якімі вырастуць мае дзеці. І вярнуцца дадому, на Радзіму. Але на сённяшні момант я радая, што апынулася ў Польшчы: калі я з’язджала з Беларусі 10 месяцаў таму, то ўжо мела новаўтварэнні і штосьці накшталт лактацыі без цяжарнасці, але тады дактары сказалі, што ўсё нармас, і каб я не парылася. Тут не так. І стаўленне, і хуткасць дыягностыкі зусім іншыя.
Калі раптам што, то хачу, каб вы ведалі: у мяне ёсць рукапіс вершаванага зборніка неапублікаваны яшчэ, дзьве гатовыя песні, на якія я ўжо год мару зняць кліп, і каля 40 песень унутры галавы і ў выглядзе пісьмовых нататак і аўдыёдэмак. Спадзяюся, гэта не знікне. Не ўпадаю ў адчай, ні ў якім разе не здаюся, але на ўсялякі выпадак апавяшчаю, што гэта ёсць, каб які-небудзь альтруіст паклапаціўся ў самым горшым выпадку.
...А яшчэ ў мяне дзьве макаўкі. І чэрап няправільнай формы. Пабачым, наколькі гэта крытычна) І добра, што я валасы абстрыгла. Не так шкада будзе», — падзялілася артыстка.
Наведвайце доктара для прафілактычнага агляду
Часцей за ўсё рак малочнай залозы выяўляецца ў выглядзе бязболевага «шарыка» або ўшчыльненні ў грудзях. Па рэкамендацыях СААЗ важна, каб жанчыны, якія выявілі анамальнае ўшчыльненне ў грудзях, без прамаруджання звярнуліся па кансультацыю да медыкаў не пазней чым праз 1-2 месяцы пасля выяўлення ўшчыльнення, нават калі яны не адчуваюць пры гэтым ніякага болю.