Літаратурна-музычныя выступы з удзелам Васіля Якавенкі і Алеся Лася прайшлі ў Гродне 22 чэрвеня.
Сустрэчы прайшлі на тэму нацыянальна-культурнага выхавання і ўсведамлення сябе беларусамі. Удзел у сустрэчах узялі пісьменнік Васіль Якавенка, музыка (дудар, скрыпач) Алесь Лось і падарожнік, эколаг Васіль Касінец. Сустрэчы адбыліся ў актавай зале СШ №3 і чытальнай зале юнацкага філіяла абласной бібліятэкі.
Адкрываў сустрэчу «уверцюрай» на беларускай дудзе Алесь Лось. Далей гаману вёў пісьменнік, дэманстраваў кніжкі сваіх экалагічных і лірычных казак, пераказваў некаторыя з іх
У першай сустрэчы ўзялі ўдзел прыкладна сто вучняў і іх выхавальнікі.
Музыка і эколаг дапаўнялі пісьменніка, дапамагалі разыгрываць прызы, сувеніры, якія ляжалі на стале, віселі паблізу.
Васіль Якавенка:
«Дзеці дружна адказвалі шмат на якія пытанні, аднак на пытанне «Што значыць быць беларусамі?» з добрага тузіну адказаў правільным быў толькі адзін: «Трэба ведаць беларускую мову і карыстацца ёй». Дзяўчына, якая яго дала, стала пераможцай і ў якасці падарунка атрымала сувенірную майку кампаніі «Будзьма беларусамі!»
На пытанне, хто ведае беларускіх дзіцячых пісьменнікаў, правільных адказаў не было, затое знайшліся дзеці, якія падахвоціліся прачытаць беларускія вершы, і дзеці, якія праспявалі беларускія песні, у тым ліку гімн. Апошнюю песню спявалі гуртам, усёй залай.
Зразумела, што многія тут атрымалі каштоўныя падарункі – майкі, кружэлкі з песнямі «Будзьма беларусамі!», кнігі казак «Смяльчак Лузь», «Чорная ружа», кнігу «След чорнага ветру» і іншыя.
На гэтай сустрэчы ўдалося ўціснуць ва ўсведамленне вучняў, што ёсць беларусы, і ўзняць прэстыж беларускай мовы. Настаўнікі як бы ў сваё апраўданне казалі нам, што яшчэ не так даўно СШ №3 славілася сваім патрыятычным выхаваннем і беларускім навучаннем, але ж не ўтрымалася і на бурнай хвалі русіфікацыі ў краіне за апошнія гады, і таму ўсё гэта размыта».
На жаль, у гасцей не склалася такой шчырай гутаркі з дзецьмі СШ №110 на сустрэчы ў бібліятэцы. Тут прысутнічала група ў складзе прыкладна 20 чалавек, і ніхто з дзяцей не ведаў іншых пісьменнікаў, апроч Купалы і Коласа, ніхто не прачытаў беларускіх вершаў.
Аднак іх выручыла дзяўчынка, якая насмелілася выйсці наперад і праспяваць беларускую песню «Купалінка».
Госці падарылі бібліятэцы свае кнігі і дыскі.
Мерапрыемствы ладзіліся ў межах кампаніі «Будзьма беларусамі!»
Тэгі: Горадня
