2 лістапада, на восеньскія Дзяды, беларусы Вільні ўшанавалі памяць беларускіх дзеячаў, пахаваных на галоўным віленскім некропалі, могілках Росы.

Араганізаваў падзею Віленскі беларускі музёй імя Івана Луцкевіча. Мерапрыемства не нагадвала афіцыёз з урачыстым ускладаннем кветак, хутчэй было падобнае на экскурсію, якую праводзіла кіраўніца музея, актывістка беларускай грамады Людвіка Кардзіс.

Удзельнікі запалілі знічкі і павязалі белыя ды чырвоныя стужкі на магілах паэта Уладзіслава Сыракомлі, святара, культуролага, гісторыка ды літаратуразнаўцы Уладзіслава Талочкі, святара, грамадскага дзеяча, паэт і музыканта Казіміра Сваяка, галоўнага архітэктара БНР Лявона Вітан-Дубейкаўскага, «бацькі беларускага музея», археолага, гісторыка, этнографа Яўстаха Тышкевіча, мецэната, сябра Францішка Багушэвіча Зыгмунта Нагродскага, сям’і Ямантаў, з якой паходзіла каханая Кастуся Каліноўскага Марыя Ямант, аднаго з арганізатараў паўстання 1863 года Аляксандра Аскеркі, кенатафах — сімвалічных магілах — «бацькоў БНР» Івана і Антона Луцкевічаў і драматурга Францішка Аляхновіча (помнік якому некалькі дзён таму аднавіла беларуская грамада) і іншых вядомых віленскіх беларусаў.

Магіла пісьменніка Ядвігіна Ш.

Магілы сям’і Ямантаў

Магіла святара, культуролага, гісторыка ды літаратуразнаўцы Уладзіслава Талочкі

Магіла святара, паэта ды музыканта Казіміра Сваяка

Кенатаф братоў Луцкевічаў

Кенатаф драматурга Францішка Аляхновіча

 
Пахаванне архітэктара Лявона Вітан-Дубейкаўскага

Магіла гісторыка Яўстаха Тышкевіча

Магіла паэта Уладзіслава Сыракомлі

Магілы роду Нагродскіх, у тым ліку Зыгмунта Нагродскага

Пахаванне прафесара Віленскага ўніверсітэта, гісторыка Іаахіма Лялевеля

Магіла аднаго з арганізатараў паўстання 1863 года Аляксандра Аскеркі

Магіла пісьменніка Уладзіслава Паўлоўскага

Яўген Ерчак, budzma.org