Абвяшчэнне другога этапу “Конкурсу культурніцкіх ідэй” кампаніяй “Будзьма беларусамі!” не дазволіла восеньскай хандры авалодаць натхненнем багатых на ідэі беларусаў і сумаваць ад адсутнасці працы Экспертнай радзе. Ацаніўшы якасць ажно 31 праекта, ступень распрацаванасці ідэй, іх унікальнасць, культурную і грамадскую значнасць, адпаведнасць шляхоў рэалізацыі мэтам і мэтавай аўдыторыі, рада вызначыла адзінаццаць пераможцаў, а таксама адзначыла 9 цікавых праектаў, якія, на жаль, не сталі лідарамі, але маюць пэўны патэнцыял у паляпшэнні культурнага фону свайго горада ці рэгіёна.

Перш-наперш віншуем пераможцаў! Вось нашыя лідары:

1. Аляксандр Горбач — “Помнік паміраючай вёсцы”.  Вэб-праект прысвечаны вёсцы Куляны (Пружанскі раён), якая вось-вось загіне, а разам з ёй — і той духоўны здабытак, што быў напрацаваны многімі пакаленнямі жыхароў. Каб захаваць усё гэта для нашчадкаў, спадар Аляксандр прапаноўвае стварыць сайт і, скарыстаўшы сучасныя тэхналогіі, перанесці ўсё, што толькі магчыма, у віртуальную прастору.
2. Уладзіслаў Іваноў (Віцебск) — праект “Віцебскія стараверы — даўнія прыбышы: культурная разнастайнасць Беларусі”, які  пазнаёміць з гістарычна‐культурнай разнастайнасцю Віцебшчыны на прыкладзе мінарытарнай культуры мясцовых старавераў, што паступова знікае.
3. Тарас Кучынскі-Паравы, Ганна Біжык, Алена Русакевіч (Мінск) — “100 год жыцця беларусаў”. Аўтары маюць на мэце паказаць змены ў беларускай народнай культуры, што адбыліся за сто гадоў, з дапамогай параўнання і адначасовага экспанавання, фатаздымкаў Ісаака Сербава і сучасных.
4. Дзяніс Канецкі, Аляксей Лужынскі — “Вілейскі досвед актыўнага краязнаўства”. Праект мае на мэце прэзентаваць грамадскім актывістам і валанцёрам розных гарадоў пазітыўны досвед актыўнай грамадскай працы ў краязнаўчай сферы Вілейшчыны.
5. “Горадаўтваральны” культурны праект “Хто стварае культуру ГОРАДні?” ад Яны Марчук — цыкл пазнавальных  лекцый,  казачных экскурсій і творчых сустрэч пра гарадскі лад жыцця і гарадскую культуру ў Горадні.
6. Алена Прохарава (г. Мінск) прапаноўвае ў межах праекта “Вывучэнне і адраджэнне беларускай традыцыйнай танцавальнай культуры” арганізацыю серыі майстар-класаў па традыцыйным танцы ў розных рэгіёнах Беларусі.
7. Валянціна Ракецкая (Мінск) — серыя семінараў “Здаровая старасць”, які будзе спрыяць павышэнню інфармаванасці ў рэгіёнах краіны адносна праблем людзей сталага ўзросту (сенсібілізацыя) і стратэгій абыходжання з гэтымі праблемамі.
8. Яўген Самсонаў, Леанід Юрык (Глыбокае) — праект па стварэнні 3-х гістарычна-біяграфічных відэафільмаў пра жыццё і дзейнасць Мечыслава Янчышына, Язэпа Драздовіча і Мар’яна Місевіча.
9. Комплекс праектаў, скіраваных на пашырэнне беларускамоўнай культурнай прасторы, ведаў па гісторыі і культуры роднага краю, пошук людзей, зацікаўленых культурніцкай дзейнасцю, ад Пастаўскай суполкі ТБМ.
10. Леанід Скарабагаты (Бабруйск) — “Бацькоўская спадчына — 2014”. Праект скiраваны на вывучэнне і папулярызацыю беларускай мовы, беларускай нацыянальнай культуры і традыцый побыту ў асяродку шматдзетных і прыёмных сем’яў па ўсёй краіне.
11. У межах праекта “Адукацыя ў галіне традыцыйнай культуры як сродак абуджэння цікаўнасці да беларушчыны і павышэння актыўнасці моладзі” ад Алены Ляшкевіч і РМГА “Студэнцкае этнаграфічнае таварыства” будзе працягвацца нефармальная адукацыя гарадской моладзі па метадзе шведскіх навучальных гурткоў.

Экспертная рада конкурсу таксама адзначыла цікавыя праекты, якія не сталі пераможцамі, але маюць досыць вялікі патэнцыял у рэалізацыі.

Кампанія “Будзьма беларусамі!” заклікае ўсіх неабыякавых да паляпшэння культурнага жыцця чытачоў і партнёраў прыгледзецца да гэтых ідэяў, бо ўсе яны вартыя рэалізацыі, хоць і не перамаглі ў конкурсе.

Сярод іх:

– Ідэя Алены Ляшкевіч (Мінск) аб выданні кнігі “Нематэрыяльная культурная спадчына Міншчыны” паводле ўжо праведзенай даследчай працы, а таксама яе прэзентацыях для ўсіх цікаўных у г. Мінску і адмыслоўцаў у сферы захавання нематэрыяльнай культурнай спадчыны з усёй Мінскай вобласці.

– Стварэнне відэапраграмы “Радавод”, прысвечанай абрадава-святочнай культуры Беларусі. Аўтар — Таццяна Івашына (Данія — Беларусь);

– Стварэнне Арганізацыі беларускай мовы і культуры ў Горадні ад Веранікі Паддубіцкай. Згуртаванне-клуб будзе разлічанае на самую шырокую аўдыторыю, без узроставых і іншых абмежаванняў, галоўнае — цікавасць да беларускай культуры і мовы, жаданне знайсці новых сяброў альбо проста пашырыць кола зносін на роднай мове.

– Цягам апошніх гадоў Віталь Юрэвіч ладзіць археалагічныя летнікі па вывучэнні старажытных пахаванняў дрыгавічоў на Старадарожчыне. І ў наступным годзе спадар Віталь хацеў бы зрабіць іх працяг, дзеля чаго і шукае аднадумцаў і ўдзельнікаў.

– Фотапраект Аляксандры Баярынай “Тры ўзросты”, г. Мінск, мае мэтай паказаць пераемнасць пакаленняў, раскрыўшы жаночую і мужчынскую ролі асобна. Ужо ёсць некалькі сем’яў-мадэляў, неабходныя сродкі на транспартныя выдаткі, а таксама арганізацыю выніковай выставы.

– Задума стварэння Часопіса для дзяцей дашкольнага і малодшага школьнага ўзросту ад Андрэя Горвата актуальная тут і цяпер: такое выданне дапаможа рускамоўным дзеткам пазнаёміцца з беларускай мовай, даць ім пачатковы лексічны запас для далейшага вывучэння мовы, праз рускую мову, а таксама праз нацыянальныя вобразы і сімвалы прывіць інтарэс да сапраўднага беларускага.

– Блізкую мэту мае безумоўна цікавы і неабходны праект “Кнігі дзеткам” ад Таццяны Цуканавай: мабільны дадатак-“чыталка” ў выглядзе кніжнай паліцы з беларускімі казкамі. Запрашаюцца да супрацы тэхнічныя спецыялісты (распрацоўшчыкі Android-версіі), беларускія выдавецтвы, беларускія аўтары казак, мастакі і перакладчыкі, а таксама фінансаванне.

–  На супольную карысць працавала б рэалізацыя маштабнага праекта — стварэння новай гарадской творча-камунікацыйнай прасторы — “Арт-парк_ЯР” ад Сяргея Голіка, Марыны Каспяровіч і Змітра Герыловіча (Мінск).

Кампанія  “Будзьма беларусамі!” гатовая аказаць гэтым праектам інфармацыйную і кансультацыйную падтрымку.

Калі вас зацікавіў удзел і/ці дапамога ў рэалізацыі вышэйпералічаных праектаў, якія цікавыя, але не ўвайшлі ў лік пераможцаў, пішыце на адрас razam@budzma.org. Мы дашлем вам кантакты аўтараў гэтых ідэяў.

Будзьма разам рабіць нашае культурніцкае жыццё лепшым!