Адной з асноўных навін на мінулым тыдні быў візіт Яго высокасці Прынца Майкла Кенцкага – стрыечнага брата каралевы Елізаветы ІІ. Галоўнай мэтай візіту стала прапаганда бяспекі дарожнага руху. Ужо каля 30 гадоў ён падтрымлівае ініцыятывы ў гэтай сферы – як у Вялікабрытаніі, так і па ўсім свеце.

Магчыма вы чулі, што ААН абвясціла дзесяцігоддзе з 2011 па 2020 г. дэкадай бяспечнага дарожнага руху. Кожны год каля 1,25 мільёна чалавек гіне ў аварыях, а дзясяткі мільёнаў атрымліваюць сур’ёзныя траўмы.

З інфармацыі на сайце праекта Belarusian Road Safety Network я даведалася, што з 2011 па 2015 г. у Беларусі загінулі больш за 4500 чалавек, а 26 000 атрымалі траўмы. Пры гэтым у 2015 годзе лічба ахвяр знізілася да 664 у параўнанні з 1200 у 2011 годзе – амаль на 45%. Колькасць тых, хто быў траўмаваны ў выпадку ДТЗ, знізілася амаль на 30%.

Я ведаю, што Прынц Майкл быў вельмі ўражаны тым, якія захады робяцца ў Беларусі, каб павысіць бяспеку дарожнага руху. Але колькасць ахвяр на мільён чалавек застаецца каля 70. У Вялікабрытаніі гэты паказчык складае 28. Гэта адзін з найлепшых вынікаў у Еўропе, калі так увогуле можна сказаць пра ахвяры ДТЗ.

У Беларусі дазволены ўзровень алкаголю ў крыві кіроўцаў блізкі да нуля. Гэта добра, бо ў Вялікабрытаніі мы не маем такіх  строгіх абмежаванняў. Але мы праводзім вельмі шырокую кампанію супраць кіравання аўтамабілем у п’яным выглядзе, асабліва пад Раство і Новы год. Таму нашы людзі прызвычаіліся, што, калі яны ідуць кампаніяй у паб ці рэстаран, хтосьці не п’е, каб потым развезці ўсіх па дамах. Мне цікава было б даведацца, ці з’яўляецца алкаголь найважнейшым фактарам у ДТЗ з ахвярамі, нават нягледзячы на закон.

ДТЗ маюць кепскі ўплыў на эканоміку і патэнцыял развіцця любой краіны таксама і таму, што выклікаюць не толькі выдаткі на лячэнне і рэабілітацыю, але і фінансавыя клопаты ў сем’ях ахвяр. Урад можа паспрыяць вырашэнню праблемы праз стварэнне законаў у галіне ключавых фактараў рызыкі, у тым ліку перавышэння хуткасці ў п’яным выглядзе, невыкарыстання шлемаў, рамянёў бяспекі і дзіцячых сродкаў бяспекі.

Але маё асноўнае пасланне для кіроўцаў – добра падумайце перад тым, як сядаць за руль нападпітку, і кіруйце бяспечна.

Фіёна Гіб