Хочаш трапіць на след ваўка і разабрацца ў акалічнасцях жыцця звышдрапежніка? Паехалі ў госці да шэрага ў Белавежскую пушчу!

1-2 лютага АПБ і анлайн-кампанія «Воўчы блог» запрашаюць на Ноч ваўкоў, каб развеяць распаўсюджаныя стэрэатыпы пра іх ды натхніць як мага больш людзей далучыцца да справы аховы роднай прыроды.

ПРАГРАМА НОЧЫ ВАЎКОЎ

РЭГІСТРАЦЫЯ НА НОЧ ВАЎКОЎ

У нашым грамадстве да ваўка склалася жорстка негатыўнае стаўленне – і гэта адмоўна ўплывае на стан дзікай прыроды Беларусі. 

Воўк – драпежнік найвышэйшага парадку, а значыць, ён падтрымлівае біялагічную разнастайнасць і самарэгуляцыю экасістэмы, у якой жыве. Але яго ролю пачаў прымяраць на сябе чалавек. Ён вырашае, колькі і якіх відаў патрэбна канкрэтнаму лесу ці нават асабліва ахоўнай тэрыторыі. Беспадстаўна перакройваючы экасістэму на свой капыл, ён парушае раўнавагу дзікай прыроды, у якой усё ўзаемазвязана.

Прыйшоў час ваўка заняць сваё пачэснае месца ў жывой прыродзе. 

У абарону звера выступае сам закон прыроды і непасрэдна прыродаахоўнікі. АПБ і Франкфурцкае заалагічнае таварыства сумесна з Нацыянальным паркам “Белавежская пушча” і польскім Белавежскім нацыянальным паркам праводзяць першую трансгранічную Ноч ваўкоў. 

Два дні ў Белавежскай пушчы з абодвух бакоў дзяржаўнай мяжы будуць вабіць ваўка, гуляць у следапытаў. Удзельнікі мерапрыемства даведаюцца пра жыццёвы распарадак, звычкі драпежніка і пра яго стасункі з чалавекам і ў сваёй сям’і.

Настасся Кузьмянкова са сваімі ваўчкамі

Кінамастак Ігар Бышнёў пакажа фільмы пра ваўкоў, навуковец і даследчык Дзмітрый Шамовіч прадэманструе “сямейныя” фота з шэрымі, генэтык з Польшчы Мацей Шэўчык раскажа, аб чым можна даведацца па ДНК ваўка.

У канцы першага дня — вячэрняя экскурсія па слядах ваўка і начное вогнішча на Царскай паляне. Чытай падрабязную праграму вандроўкі для аматараў дзікай прыроды і далучайся! Такога падарожжа мы яшчэ не ладзілі.

Як АПБ шукае пачэснае месца для ваўка ў беларускіх лясах? 

Даследаваннем сітуацыі па ваўку АПБ займаецца з 2013 года. Мы расказваем пра асабістае жыццё гэтых драпежнікаў, каб людзі не паддаваліся сляпому страху перад імі. 

У межах анлайн-кампаніі vouk.by спрабуем паглядзець на свет вачыма звера. Дапамагаюць у гэтым палявыя супрацоўнікі. Яны ўсталёўваюць фотапасткі, па слядах высочваюць ваўкоў, каб падлічыць іх, робяць генетычны аналіз груповак. Усё гэта дзеля адной вялікай мэты —  спыніць татальны адстрэл ваўкоў.

Віктар Фянчук і Валерый Дамброўскі на палявых работах

У ваўчынай кампаніі АПБ дапамагае Франкфурцкае заалагічнае таварыства. Воўк, які знаходзіцца на вяршыні ланцугу харчавання, абараняецца ў межах Прыродаахоўнага праекта для Белавежскай пушчы і праекта “Палессе — дзікая прырода без межаў”. Акрамя эколагаў ды іншых навукоўцаў, кампанія па выратаванні драпежніка захапіла розных па адукацыі і прафесійных абавязках людзей, якіх яднае занепакоенасць лёсам віда. Многіх з іх ты ўбачыш на Ночы ваўкоў 1-2 лютага.

Ірына Кашпей распавядае пра беларускіх ваўкоў на ТedX Minsk

Ірына Кашпей, спецыяліст АПБ па прыродаахоўных пытаннях спадзяецца, што Ноч ваўкоў прыцягне ўвагу грамадства да цяжкага становішча, у якім апынуўся від:

 “Многія людзі адчуваюць глыбокі, нават радавы страх перад ваўком. У яго падмурку — недахоп ведаў. Чалавек, які не разумее, чым выкліканыя паводзіны жывёлы, не ведае, як да гэтага ставіцца, ад таго і баіцца. На Ночы ваўкоў мы падзелімся гэтымі ведамі. Спадзяюся, што з цягам часу ўсё больш людзей пачне ставіцца з павагай да ваўка, якога многія пакуль што лічаць непажаданым відам!” 

Аліна Ляпёшкіна, Ахова Птушак Бацькаўшчыны