29 верасня а 17.00 гадзіне ў Музеі гісторыі Віцебскага народнага мастацкага вучылішча адбудзецца адкрыццё выставы мастацкай спадчыны Васіля Быкава з фондаў Дзяржаўнага музея гісторыі беларускай літаратуры.
Малюнак Васіля Быкава
Творчасць народнага пісьменніка Беларусі Васіля Уладзіміравіча Быкава заўсёды прыцягвала ўвагу аматараў літаратуры. Але не шмат хто ведае, што вядомы беларускі літаратар спрабаваў свае творчыя сілы і ў выяўленчым мастацтве. Гэта асобная старонка творчай біяграфіі Васіля Быкава, распавядаюць арганізатары выставы.
Пісьменнік захапляўся маляваннем яшчэ з дзяцінства. «Выяўленчае мастацтва ўвайшло ў маю душу з малюнкаў, кніжных ілюстрацый, – сведчыць Васіль Уладзіміравіч у мемуарнай кнізе «Доўгая дарога дадому». – Асабліва захаплялі гравюры ў старых кнігах Жуля Верна ды іншых».
У 1939 годзе, пасля сканчэння 8 класаў, ён паступіў у Віцебскае мастацкае вучылішча. Аднак увосень 1940 года, у сувязі з пагаршэннем матэрыяльнага становішча сям’і і адменай дзяржаўных стыпендый, ён вымушаны быў пакінуць вучобу. Пасля сканчэння вайны, у канцы 1940-х, Быкаў зноў планаваў паступіць у мастацкае вучылішча ў Менску. Аднак ён патрапіў у Гродна, дзе некаторы час працаваў у мастацкіх майстэрнях.
«Стаўшы выбітным пісьменнікам, Васіль Быкаў заўсёды знаходзіў час для алоўка, пэндзля і паперы. Такія мастацкія практыкаванні, якія Быкаў іранічна называў «мастацкі зуд», былі яго пажыццёвым захапленнем. Аднак пры яго жыцці ведалі пра гэта бадай толькі родныя ды блізкія сябры.
Родныя з дзяцінства мясціны, успаміны пра вайну, жыццёвыя ўражанні, прыемныя і не вельмі прыемныя выпадкі з уласнага жыцця, самаіранічныя здзекі, працэс засваення аўтамабільнай справы, будаўніцтва дачы ў Ждановічах пад Мінскам – усё гэта «ахапіў» аловак Васіля Быкава. На выставе «Васіль Быкаў. Праз абрысы і лініі» будуць прадстаўлены менавіта такія работы. Кожная з іх па-мастацку дакладна і яскрава сведчыць пра жыццёвыя падзеі нашага славутага земляка», –падкрэсліваюць у Віцебскім цэнтры сучаснага мастацтва.
Выстава працягнецца да 13 лістапада 2023 года.
Чытайце таксама: Невядомае інтэрв’ю Васіля Быкава пра Уладзіміра Караткевіча
