У межах дадатковага набора на бакалаўрскія і магістарскія праграмы Еўрапейскі гуманітарны ўніверсітэт (ЕГУ) запрашае вучняў старэйшых класаў і выпускнікоў школ, гімназій і ліцэяў, а таксама ўсіх зацікаўленых у атрыманні бакалаўрскай ці магістарскай ступені наведаць бесплатны адукацыйны воркшоп «Універсітэцкія канікулы з ЕГУ», які адбудзецца 5 жніўня ў Мінску.
Падчас мерапрыемства абітурыенты ўніверсітэта будуць мець магчымасць прыняць удзел у лекцыях і дыскусіях, а таксама атрымаць базавую інфармацыю пра найбольш актуальныя накірункі ў галіне гуманітарных і сацыяльных навук, якія прапануюцца да вывучэння на бакалаўрскіх і магістарскіх праграмах ЕГУ.
Уступную лекцыю правядзе парфесар-эмерыт Рыгор Мінянкоў, які распавядзе пра актуальнасць гуманітарнай адукацыі ў сучасным свеце. Абітурыенты, зацікаўленыя ў паступленні, змогуць атрымаць канстультацыі ад супрацоўнікаў Рэктарскага офіса ЕГУ. Удзельнікі таксама даведаюцца пра магчымасці міжнародных адукацыйных абменах і ўдзеле ў навуковых канферэнцыях падчас навучання ў ЕГУ.
Выпускнікі ЕГУ, якія таксама наведаюць воркшоп, распавядуць абітурыентам пра кар’ерныя і навуковыя магчымасці пасля навучання ва ўніверсітэце.
Воркшоп адбудзецца ў Мінску ў каворкінгу «Хто такі Джон Голт?» (вул. Шорная 20-1Н). Рэгістрацыя ўдзельнікаў адбываецца па спасылцы да 4 жніўня.
Папярэдняя праграма мерапрыемства:
11:30-12:00 Рэгістрацыя ўдзельнікаў
12:00-13:00 Уступная лекцыя выкладчыкаў ЕГУ
13:10-14:00 Прэзентацыя міжнародных магчымасцяў ЕГУ
14:10-14:40 Прэзентацыя кар’ерных і навуковых магчымасцяў пасля навучання ў ЕГУ з удзелам выпускнікоў універсітэты
14:40-15:00 Кансультацыі па пытаннях паступлення
Нагадваем, што з 25 ліпеня па 12 жніўня адкрыты дадатковы набор на бакалаўрскія праграмы дзённай і дыстанцыйнай форм навучання «Міжнароднае права і права Еўрапейскага саюза», «Медыя і камунікацыя», «Сусветная палітыка і эканоміка», а таксама «Культурная спадчына і турызм» дыстанцыйнай формы навучання і на магістарскія праграмы «Культурныя даследванні», «Публічная палітыка», «Міжнароднае права і права Еўрапейскага саюза». Адначасова працягваецца перавод студэнтаў з іншых універсітэтаў і працэс аднаўлення ў шэрагі студэнтаў ЕГУ тых асоб, хто з той ці іншай падставы быў вымушаны прыпыніць навучанне.
Заяўкі на праграму Падрыхтоўчага года ў Вільні і Мінску прымаюцца па 9 верасня.
Набор у дактарантуру па накірунку «Філасофія» праходзіць па 26 верасня.
Новы акадэмічны год у ЕГУ пачнецца 3 кастрычніка.
Кантактная асоба: каардынатар па набору студэнтаў Аліна Яблонская, [email protected], +370 686 34 133
