У суполцы «Максім перадусім» у Фэйсбуку апублікавалі фотаздымак атэстата Максіма Багдановіча з Яраслаўскай мужчынскай гімназіі.
Дакументы Яраслаўскай мужчынскай гімназіі, дзе вучыўся Максім Багдановіч, і дзе ў 1911 годзе ён здаваў іспыты, каб атрымаць атэстат сталасці, захоўваюцца ў Цэнтральным дзяржаўным архіве горада Масквы.
У спісе асоб, якія збіраюцца здаваць экзамены (праходзіць іспыты):
Багдановіч Максім Адамавіч.
Дата нараджэння — 27 лістапада 1891 г. Месца нараджэння — Мінск.
Веравызнанне — праваслаўнае. Сын калежскага асэсара.
Вучыўся ў Ніжагародскай гімназіі са жніўня 1902 года да снежня 1908 года, і ў Яраслаўскай гімназіі са студзеня 1909 года.
Вось якія адзнакі, згодна фотаздымку атэстата, атрымаў будучы паэт:
Пісьмовыя іспыты: руская мова з царкоўнаславянскай і славеснасць (5), матэматыка (3).
Вусныя іспыты: закон Божы (3), руская мова з царкоўнаславянскай і славеснасць (5), лацінская мова (4), матэматыка (3), гісторыя (4), нямецкая мова (3), французская мова (4).
Сярэдні бал атэстата Максіма Багдановіча: 3,6666666...
Паводзіны — выдатныя.
Суполка «Максім перадусім» апублікавала таксама некалькі задач, якія даводзілася рашаць Максіму Багдановічу па алгебры і геаметрыі ў Яраслаўскай гімназіі.
Багдановіч заслужана лічыцца адным са стваральнікаў мадэрнай беларускай літаратуры, найперш — паэзіі. Вершы і санеты Багдановіча апынуліся сумессю рамантызму, сімвалізму, антычных матываў, роднага і замежнага, нацыянальнага і сацыяльнага...
Пры жыцці Багдановіча выйшаў усяго адзін ягоны зборнік — «Вянок» — але ў ім, нібы ў мікрачыпе, былі ўкладзеныя ўсе асноўныя сэнсы беларускай дарэвалюцыйнай паэзіі. Кажуць, на Багдановіча паўплывалі доўгія гады жыцця ў Расіі: адсюль светлы сум па Бацькаўшчыне. Магчыма, абвостранае адчуванне прыгажосці ды хуткага канца ўзнікла праз сухоты, якія ўрэшце і забілі паэта.
Помнікі паэту ёсць у Мінску і Яраслаўлі, а геаграфія дамоў-музеяў ды памятных мясцінаў — шырэйшая. Але найлепшым мемарыялам творцу сталі ягоныя вершы: «Паміж пяскоў егіпецкай зямлі», «Зорка Венера», «Пагоня»... Гэтыя ды іншыя творы, прадэкламаваныя і пераспяваныя безліч разоў, будуць жыць столькі, колькі Радзіма паэта.
Чытайце яшчэ:
Чым адметны Яраслаўскі музей Максіма Багдановіча: гісторыя і сучаснасць
