У сучасным свеце сродкі масавай інфармацыі адыгрываюць ключавую ролю, бо менавіта яны ўплываюць на грамадскую думку і даносяць да сваіх чытачоў/слухачоў неабходныя мэсіджы. Але нярэдка здараецца так, што неабыякавыя і актыўныя грамадзяне застаюцца са сваімі праектамі і задумамі на ўзбочыне інфармацыйнага поля. А журналісты, у сваю чаргу, не заўсёды могуць зразумець, што навіна сапраўды вартая розгаласу.
Хто вінаваты і як змяніць гэтую сітуацыю? Якім чынам грамадскім актывістам зацікавіць сваёй дзейнасцю тых, хто піша, а медыям – убачыць сярод вялікай колькасці падзеяў сапраўды значную сацыяльную з’яву, якая з дапамогай СМІ можа і павінная выклікаць шырокі рэзананс у грамадстве? Як расказаць гісторыю пра валанцёра ці грамадскае аб’яднанне, якую прачытаюць тысячы?
Грамадская культурніцкая кампанія “Будзьма беларусамі!” і Цэнтр даследавання грамадскага кіравання SYMPA запрашаюць журналістаў, блогераў і грамадскіх актывістаў Барысава абмеркаваць гэтыя важныя пытанні і разам знайсці магчымыя рашэнні на сустрэчы прэс-клуба разам з цікавымі і дасведчанымі спікерамі:
Яся Каралевіч-Картэль (Мінск), рэдактарка інтэрнэт-часопіса пра Мінск CityDog.by;
Настасся Баброўская (Барысаў), журналістка партала Ex-press.by;
Алена Аўтушка (Барысаў), грамадская актывістка і журналістка, старшыня Барысаўскай жаночай грамадскай арганізацыі “Правінцыя”.
Вы – грамадскі актывіст, ладзіце цікавыя мерапрыемствы, абараняеце і прасоўваеце грамадскія інтарэсы і пра вас не піша прэса? Спытайце, чаму!
Вы – журналіст ці блогер, а грамадскія актывісты дасылаюць вам няўцямную інфармацыю ці нецікавыя запрашэнні? Падзяліцеся, як пісаць так, каб гэта вас зачапіла.
Каб узяць удзел у сустрэчы, калі ласка, пакіньце анлайн-заяўку да 28 сакавіка ўключна.
29 сакавіка, Барысаў, гастрапаб “Fабрика”, вул. Даўмана, 78.
Пачатак: 19.00
Даведкі: +375297121803, razam@budzma.by
