5 сакавіка а 16-й гадзіне ў Дзяржаўным літаратурна-мемарыяльным музеі Якуба Коласа адбудзецца ўрачыстае адкрыццё часовай экспазіцыі “Легенды солнечного камня” з фондаў Калінінградскага абласнога гісторыка-мастацкага музея (Расійская Федэрацыя).
Калініградская вобласць шырока вядома як адно з найвялікшых радовішчаў бурштыну. Менавіта тут знаходзіцца каля 90 % сусветных бурштынавых запасаў. Бурштын – прыродны камень, які выкарыстоўваецца не толькі ў прамысловых мэтах (пры дрэваапрацоўцы, вырабе медыцынскага посуду, у жывёлагадоўлі і птушкагадоўлі, як харчовая дабаўка), але і ў ювелірным мастацтве. З даўніх часоў з бурштыну робяць вытанчаныя побытавыя рэчы і ўпрыгожванні: гадзіннікі, партсігары, попельніцы, скарбонкі, каралі і кулоны, бранзалеты і пярсцёнкі.
Разнастайныя вырабы з бурштыну прадстаўлены ў Калінінградскім абласным гісторыка-мастацкім музеі, дзе захоўваецца каля 140 тысяч прадметаў з прыродазнаўчых, археалагічных, гістарычных і мастацкіх калекцый. Экспазіцыя музея багата звесткамі пра прыродныя багацці края, станаўленне маладой Калінінградскай вобласці і гісторыю ваенных падзей падчас Вялікай Айчыннай вайны. Музей, адкрыты ў 1946 годзе, з’яўляецца равеснікам Калінінградскай вобласці і знаходзіцца ў адноўленым помніку архітэктуры пачатку ХХ стагоддзя – будынку Штадтхалле.
Музей народнага паэта Беларусі не першы год супрацоўнічае з Калінінградскім гісторыка-мастацкім музеем, адбываецца рэгулярны абмен выстаўкамі, праводзяцца сумесныя мерапрыемствы і праекты. Выстаўка “Легенды солнечного камня” насычана інфарматыўнымі матэрыяламі з гісторыі апрацоўкі прыроднага бурштыну і яркімі ўзорамі выкарыстання сонечнага каменя ў самых розных сферах жыццядзейнасці – арыгінальнымі экспанатамі з фондаў Калінінградскага абласнога гісторыка-мастацкага музея. Наведвальнікі атрымаюць магчымасць пабачыць як фабрычныя, так і аўтарскія вырабы: ювелірныя ўпрыгожванні (бранзалеты, пярсцёнкі, брошкі, кулоны, каралі, калье, завушніцы), прадметы побыту (нажы для паперы, скрынкі, скарбонкі, гузікі, мундштукі, табакеркі), дэкаратыўныя фігуркі і сувеніры, а таксама прыклады прыроднага бурштыну.
Акрамя таго, наведвальнікі змогуць не толькі палюбавацца на прыгажосць бурштынавых рэчаў, але і набыць упрыгожванні для сябе і блізкіх: на часовай экспазіцыі будзе дзейнічаць выстаўка-продаж літоўскіх вырабаў з бурштыну.
Тэрмін дзеяння часовай экспазіцыі: 05.03.2019 – 05.06.2019.
Шчыра запрашаем!
Адрас музея: г. Мінск, вул. Акадэмічная, 5.
Тэл. для даведак: 284-15-84, 284-17-02
Афіцыйны сайт: www.yakubkolas.by
E-mail: myzeykolas@yandex.ru.
Мы ў сацсетках: ВК: vk.com/yakubkolasby. Instagram: @kolasmuseum.
