Адкрыццё выставы «Аб зямлі і небе» Анатоля Кузняцова

26 красавіка 2017 года ў 17.00 у Нацыянальным мастацкім музеі Рэспублікі Беларусь адбудзецца адкрыццё выставы «Аб зямлі і небе», прысвечанай 70-годдзю вядомага беларускага мастака, таленавітага педагога, уладальніка медаля Францыска Скарыны, лаўрэата спецыяльны прэміі Прэзідэнта Рэспублікі Беларусь Анатоля Васільевіча Кузняцова.

У межах урачыстага адкрыцця адбудзецца прэзентацыя альбома жывапісу А.В. Кузняцова «Аб зямлі і небе», падрыхтаванага да 70-годдзя з дня нараджэння мастака і 40-годдзя яго творчай дзейнасці.

У экспазіцыі будзе прадстаўлена больш за шэсцьдзясят жывапісных работ майстра, створаных ім на працягу апошніх двух дзесяцігоддзяў (1996–2016).

Магчымасць стварэння аналогіі невымоўнага і неспасціжнага з’яўляецца цэнтрам яго даследавання. Пошук усёабдымнага вобраза, візуальнага адбітка навакольнай рэальнасці прывёў мастака да адмаўлення ад рэалістычнага пераасэнсавання. Працы Анатоля Кузняцова сцвярджаюць невытлумачальнасць і неартыкуляванасць як асноўны прынцып жывапісу. Толькі крэатару адкрываецца ўтоеная гармонія ўсіх рэчаў, толькі ён здольны распазнаць, улавіць і даць магчымасць наблізіцца да нерэальнай матэрыі ўсяго існага – так мы можам, калі не ўбачыць, то адчуць, пазнаць яе прысутнасць.

 АНАТОЛЬ ВАСІЛЬЕВІЧ КУЗНЯЦОЎ нарадзіўся 29.04.1947 г. у Усць-Камчацку Хабараўскага края (Расія).

Школьныя гады правёў у пасёлку Свень Бранскай вобласці. Наведваў народную студыю ў бранскім Палацы культуры чыгуначнікаў. Педагог – Віктар Вараб’ёў.

1967–1969 гг. – служба ў арміі (Капусцінін Яр Астраханскай вобласці).

1970–1976 гг. – Беларускі тэатральна-мастацкі інстытут (цяпер – Беларуская дзяржаўная акадэмія мастацтваў), аддзяленне станковага жывапісу. Вучыўся ў Барыса Аракчэева, Анатоля Бараноўскага, Ігара Грыгаровіча, Мая Данцыга, Барыса Казакова, Пятра Крохалева, Хаіма Ліўшыца, Вячаслава Цюрына.

1970–1974 гг. – выкладанне на архітэктурным факультэце Беларускага

політэхнічнага інстытута (цяпер – Беларускі нацыянальны тэхнічны ўніверсітэт).

З 1983 г. – член Беларускага саюза мастакоў.

1979–1989 гг. – член творчай групы «БУКУБ»

З 1988 па 2002 г. – член творчага аб’яднання «НЯМІГА-17».

1989 г. – лаўрэат Усесаюзнай выставы-конкурсу жывапісу. ЦДМ (г. Масква, Расія).

1997 г. – медаль Беларускага саюза мастакоў за заслугі ў выяўленчым мастацтве.

З 2000 г. – член Міжнароднага саюза мастакоў «СОНЕЧНЫ КВАДРАТ» (Масква, Расія).

З 2003 г. – член новага Еўрапейскага культурнага парламента (Другая сесія. Грац, Аўстрыя).

2013 г. – медаль Францыска Скарыны за ўклад у развіццё і прымнажэнне духоўнага і інтэлектуальнага патэнцыялу, культурнай спадчыны беларускага народа.

2015 г. – спецыяльная прэмія Прэзідэнта Рэспублікі Беларусь дзеячам культуры і мастацтва за шматгадовую творчую дзейнасць і стварэнне высокамастацкіх жывапісных твораў.

Работа выставы працягнецца да 21 мая 2017 года.