Адкрыццё выставы «Горад. Архітэктура. Мы»

З 16 жніўня 2017 года па 1 кастрычніка адбудзецца экспанаванне выставы «Горад. Архітэктура. Мы», прымеркаванай да святкавання 950-годдзя Мінска. Экспазіцыю складуць больш за 90 твораў жывапісу, графікі і скульптуры з калекцыі Нацыянальнага мастацкага музея Рэспублікі Беларусь, якія перадаюць аблічча горада – старажытнага і сучаснага, даваеннага і пасляваеннага, урачыстага і паўсядзённага, горада плошчаў, праспектаў і спальных раёнаў. Прапанаваная выстава ставіць на сваёй мэце паказаць Мінск шматпланавым як у часе і тэмах, так і ў мастацкіх стылях, наблізіцца да разумення тэмы горада ў беларускім выяўленчым мастацтве, выявіць кола ідэй, матываў і прыёмаў унутры гэтай тэмы, іншымі словамі – асэнсаваць і паказаць пэўны зрэз гарадской іканаграфіі. Выстава дае рэдкую магчымасць убачыць у адзінай выставачнай прасторы працы беларускіх мастакоў розных пакаленняў, мастацкіх традыцый і стылявых арыенціраў, якія былі створаны практычна за 100 гадоў і так па-рознаму адлюстроўвалі сталіцу нашай дзяржавы.

Урачыстае адкрыццё праекта адбудзецца 28 жніўня ў 18.00.

Да адкрыцця выставы прымеркавана прэзентацыя альбома «Горад. Архітэктура. Мы», у які ўвайшло каля 400 твораў жывапісу, графікі і скульптуры. Альбом падрыхтаваны сумесна з выдавецтвам «Мастацкая літаратура».

Куратар выставы – Кацярына Ізафатава, загадчык аддзела сучаснага беларускага мастацтва