22 чэрвеня 2017 года а 17-ай гадзіне ў Рэспубліканскай мастацкай галерэі Беларускага саюза мастакоў (Палац мастацтва, вул. Казлова, 3) адбудзецца адкрыццё юбілейнай выставы Сяргея Пісарэнкі. Увазе наведвальнікаў будуць прадстаўлены акварэльныя і жывапісныя творы аўтара.
Тонкі лірызм, эмацыянальная лёгкасць і адначасова філасофская глыбіня твораў Сяргея Пісарэнкі робяць непаўторным успрыманне яго прац. Мігатлівая, агорнутая туманам і таямніцай матэрыя стварае ўмовы не толькі для сузірання, але і пачуцця ўключанасці ў атмасферу, у прастору, напоўненую энергіяй адкрыцця і ўнутранага дыялогу.
Амаль няўлоўны рух пэндзля, які надае эфект хісткасці і мігацення, размытая, плыткая лінія контуру, а таксама каларыстычныя нюансы, глыбіня і мяккасць паўтонаў, колеравая палітра, якая складаецца з мноства адценняў, вызначаюць унікальную манеру аўтара, які стварае ў працах вобразы таямнічыя, фантастычныя і ірэальныя. І гэта нягледзячы на тое, што мастак адлюстроўвае цалкам «звычайныя» краявіды – заснежаныя зімовыя пейзажы, восеньскія сады, вясковыя панадворкі, адзінокія дрэвы, або нацюрморты з кветкамі, садавінай-гароднінай. Але так і ўяўляецца, як з-за таго дрэва, з якога яшчэ не паспеў апасці апошні ліст, з’явіцца нарштэйнаўскі Вожык і распавядзе нам пра своё чароўнае падарожжа праз межы двух светаў – рэальнага і незямнога.
Сяргей Пісарэнка нарадзіўся ў 1967 годзе ў горадзе Маладзечна Мінскай вобласці.
1978-1985 гг. – Рэспубліканская школа-інтэрнат па музыцы і выяўленчаму мастацтву (цяпер Гімназія-каледж мастацтваў імя І.В. Ахрэмчыка).
1985-1994 гг. – Беларуская дзяржаўная акадэмія мастацтваў, аддзяленне станковай графікі. Вучыўся ў Г.С. Грака, П.А. Семчанкі, У.С. Басалыгі, У.П. Савіча, В.Г. Паўлаўца, У.М. Вішнеўскага, В.П. Цюрына. Дыпломная праца – рукапісная кніга «Песня пра зубра» – пад кіраўніцтвам В.П. Шаранговіча.
Сябра Беларускага саюза мастакоў з 2008 г.
1991 г. – удзельнік міжнароднай выставы «Час» у Кракаве, Польшча.
З 1994 г. – пастаянны ўдзельнік рэспубліканскіх і міжнародных выстаў, мастацкіх пленэраў.
1994, 1995, 1997-2000, 2003, 2004, 2008 гадах – міжнародныя выставы ў Германіі: Фройдэнберг (Freudenberg), Оцберг (Otzberg), Кройцталь (Kreuztal), Нойнкірхен (NeunKirchen), Хайдэльберг (Heidelberg), Браўншвэйг (Braunschweig).
1995-1998, 2005 гг. – рэспубліканская выстава шрыфта і каліграфіі «Літарт».
2000 г. – персанальная выстава ў Еўрапейскім гуманітарным універсітэце, Мінск.
2004-2010 гг. – выстава аб’яднання мастакоў «Арцель» у Музеі сучаснага выяўленчага мастацтва ў Мінску.
2005 г., 2009 гг. – біенале «Акварэль» у Намюр (Namur), Бельгія.
2011 года – персанальная выстава “Licht des Traumes” у Вісельхёведзе (Visselhovede), Германія.
2013 г. – персанальная выстава «Сакрамэнт святла» у Гарадской мастацкай галерэі твораў Л. Шчамялёва, Мінск.
Снежань 2014 – студзень 2015 г. – 2 залатыя медалі (намінацыі “Жывапіс / Графіка» і «Прыз глядацкіх сімпатый») на міжнароднай выставе «Прастора быцця» у Цэнтральным доме мастака ў Маскве, Расія.
Работы мастака прадстаўлены ў калекцыі Нацыянальнага цэнтра сучасных мастацтваў, у калекцыі кампаніі Samsung (Паўднёвая Карэя), у Белым доме (Вашынгтон, ЗША), у прыватных калекцыях Беларусі, Расіі, Германіі, Швецыі, Швейцарыі, Іспаніі.
Тэрмін правядзенне выставы: з 22 чэрвеня па 7 ліпеня 2017 года, штодзень з 11.00 да 19.00, апрача панядзелка. Тэлефоны для даведак: (017) 288 15 49, (017) 290 60 10 – Палац мастацтва (017) 296 67 84 – Беларускі саюз мастакоў.
З інфармацыяй пра мінулыя, дзейныя і запланаваныя выставы можна азнаёміцца на сайце Беларускага саюза мастакоў www.belartunion.by
