9 снежня адбудзецца “Агінскі “Спеўны сход”, дзе кожны прыхільнік творчасці нашага славутага кампазітара зможа праспяваць яго рамансы.
“Такім чынам, супольна, творы Міхала Клеафаса Агінскага раней ніколі не гучалі, – распавядае мастацкі кіраўнік “Спеўнага схода” Сяргей Доўгушаў. – Спадзяюся, мерапрыемства дапаможа лепш зразумець творчасць нашага суайчынніка, не толькі далучыцца да яго музыкі, але і адчуць саму эпоху рамантызма”.
У 2014 г. “Спеўны сход” ужо звяртаўся да беларускай прафесійнай музыкі: удзельнікі мерапрыемства выконвалі канты часоў ВКЛ. Тады гучала музыка з “Полацкага” і “Аршанскага” сшыткаў”, рукапіса “Куранты”. Цяпер жа, у гонар 250-годдзя з дня нараджэння М. Кл. Агінскага, “спеўнасходаўцы” звяртаюцца да іншай гістарычнай эпохі.
Галоўны госць “Спеўнага схода” – музыказнаўца Светлена Немагай, аўтар кнігі пра жыццё і творчасць Агінскага. У якасці спецыяльнага госця запрошаны ансамбль салістаў “Вытокі”.
Далучайцеся ў сацыяльных сетках: facebook.com, vk.com.
“Спеўны сход” пройдзе 9 снежня ў прасторы “Хто такі Джон Голт?”.
Адрас: Мінск, вул. Шорная, 20, цокальны паверх.
Пачатак а 19.00.
Уваход – свабодны.
“Спеўны сход” увесну 2014 года распачалі Сяргей Доўгушаў і Аляксей Чубат. Праект спрыяе адраджэнню культуры супольных спеваў, яднае людзей, дапамагае захоўваць нематэрыяльную культурную спадчыну Беларусі.
