«Belarus Outside Sound System: Echoes of Chornobyl» у Варшаве

24 красавіка, у пятніцу, у Варшаве адбудзецца спецыяльная сесія праекта Belarus Outside Sound System — Echoes of Chornobyl, прымеркаваная да 40-годдзя катастрофы на Чарнобыльскай АЭС.

Гэта дабрачынная імпрэза на скрыжаванні электроннай музыкі і візуальнага мастацтва, якая звяртаецца да тэмы памяці, наступстваў катастрофы і іх працяглага ўплыву на людзей і навакольнае асяроддзе.

У праграме — жывыя электронныя выступы беларускіх артыстаў, якія працуюць без камп’ютараў і флэшак, выкарыстоўваючы толькі апаратныя інструменты.

Ад эмбіента і IDM да тэхна і эксперыментальнай электронікі — падзея выбудоўваецца як адзінае гукавое перажыванне.

Візуальная частка натхнёная архіўнымі матэрыяламі, тэмай зоны адчужэння і ўяўленнем пра «нябачныя працэсы», якія працягваюцца да сёння.

Удзел бяруць:

• Pocket Rave

• I/DEX

• kaini

• SYNTRIG

• mufer

• VJ: Digital Activism

Падзея рэалізуецца ў партнёрстве з Экодомам і з’яўляецца часткай кампаніі да 40-годдзя аварыі на Чарнобыльскай АЭС, ініцыяванай «Зялёнай сеткай», Экадомам і Альянсам «Зялёная Беларусь» пры падтрымцы Dialog büro.

Уваход — данат ад 30 злотых. Усе сродкі будуць накіраваныя на падтрымку беларускіх палітвязняў праз фонд BYSOL.