Другая сустрэча літаратурнага клуба ў Тбілісі

У пятніцу, 26 жніўня, беларускі літаратурны клуб у Тбілісі збіраецца ў другі раз і запрашае ўсіх ахвотных далучацца.

---

Дата: 26 жніўня

Час: 19.00 (час мясцовы)

Месца: Тбілісі (дакладнае месца паведамяць удзельнікам пазней) 

Мінулым разам шмат гутарылі ўвогуле пра беларускую літаратуру ды яе месца ў свеце, пасля знаёміліся з жыццёвым шляхам Васіля Быкава і толькі напрыканцы дайшлі да абмеркавання твораў.

Таму вось які план на новую гутарку:

Завяршэнне абмеркавання твораў «Афганец» і «Ваўчыная яма» (новыя ўдзельнікі маюць час іх прачытаць і далучыцца);

Абмяркаванне апавяданняў «Жоўты пясочак» і «На чорных лядах» (апошняе апцыянальна);

Працяг знаёмства з біяграфіяй Быкава.

Але ж ніякая літаратура не можа існаваць асобна, таму гэтым разам будзе і знаёмства перакладамі твораў замежных пісьменнікаў.

Пачнуць з Эдгара Алана По, амерыканскага аўтара, вынаходніка дэтэктыўнай навэлы (detective story) і заснавальніка жанру жахаў (horror).

Да сустрэчы прапануюць прачытаць яго мале-е-енечкі твор «Авальны партрэт».

Уваход вольны, але ж не забудзьцеся зарэгістравацца ў адмысловай апытанцы. Ды дадавайцеся ў чат клуба!

І нават калі не атрымаецца нічога прачытаць, проста прыходзьце!