Дыскусія: Музей на постсавецкай прасторы: час зменаў?

18 чэрвеня ў прасторы ЦЭХ (Кастрычніцкая 16) у 18-00 адбудзецца дыскусія «Музей на постсавецкай прасторы: час зменаў?» з нагоды выхаду новага нумара альманаха pARTisan, прысвечанага музею на постсавецкай прасторы.

У дыскусіі возьмуць удзел: дырэктарка Музея З.Азгура Аксана Багданава, мастак і пісьменнік Артур Клінаў, мастак Руслан Вашкевіч, а таксама адмысловая госця з Украіны — Юлія Ваганава, намесніца дырэктаркі па выстаўнай рабоце і міжнароднай дзейнасці Нацыянальнага мастацкага музея ў Кіеве. Мадэратар — Аляксей Братачкін, гісторык, кіраўнік канцэнтрацыі «Публічная гісторыя» пры ECLAB.

Падчас дыскусіі будуць абмяркоўвацца наступныя пытанні:

 Наколькі была трансфармавана музейная сфера на постсавецкай прасторы? Што ўдалося зрабіць?

 Якія пазітыўныя / негатыўныя моманты трансфармацыі можна адзначыць? Якія стратэгіі трансфармацыі музейных інстытуцый (не) працуюць? Наколькі мы можам звяртацца да досведу заходніх краін?

У гэты ж вечар будзе прэзентаваны музейны нумар pARTisan.

Штэфан Ваквітц, кіраўнік Інстытута Гётэ ў Тбілісі, адзначае ў сваім інтэрв’ю для pARTisan, што мы таксама павінны разумець музей як аўтапартрэт грамадства, прастору для даследавання мясцовага кантэкста, а таксама для фарміравання ідэнтычнасці нацыі. Гэтая думка стала ключавой для pARTisan у разважаннях пра беларускі музей, на якім да гэтай пары можна адчуваць уплыў савецкай ідэалогіі.

«Калі галоўны музэй краіны ёсьць рэпрэзэнтантам улады, то якую ўладу сёньня рэпрэзэнтуе Нацыянальны мастацкі музэй зь яго эклектычнай экспазыцыяй, што складаецца зь дзіўнага міксту сармацкага партрэту, парцалянавых статуэтак, твораў сацыялістычнага рэалізму, аўтарскіх варыянтаў пэйзажаў Шышкіна ды эскізаў да карцін перасоўнікаў? Гаворачы пра ўладу, размова ідзе не пра яе пэрсаніфікацыю, а пра онталягічную сутнасьць, то-бок паняцьце ўлады як сувэрэна ў незалежнай краіне».

Артур Клінаў. Шпацыр па ўяўным музэйным дыснэйлэндзе. (Утапічны праект перафарматаваньня менскіх музэяў)

Уваход вольны!