У нядзелю, 28 верасня, беларуская куратарка Вольга Мжэльская кліча на экскурсію па фестывалі сучаснага мастацтва FRINGE.
У рамках фэста працуе 80 выстаў. Маршрут жа гэтага шпацыра аб’ядноўвае тры выставы, якія даследуюць памяць, духоўныя і культурныя традыцыі, а таксама іх супярэчлівасць.
Злучаючы гэтыя праекты, экскурсія дазваляе дакрануцца да памяці тых, хто часта застаецца па-за афіцыйнымі наратывамі, але чый досвед фарміруе калектыўную і культурную памяць.
Экскурсія пачынаецца з сольнай выставы Justyny Baśnik «Panaceum», дзе працы асвятляюць ролю зеляровак і даюць голас выключаным з дамінуючай гісторыі.
Другая кропка — калектыўная выстава беларускіх і польскіх мастакоў «Un-packing: Прабелы ў памяці», якая паказвае складаную ідэнтычнасць Падляшша і дыялог мінуўшчыны з сучаснасцю.
Завяршае маршрут «To Go Far Is To Return» Машы Мароз, дзе праз касмагонічныя міфы даследуюцца цыклічнасць, межавасць і адраджэнне.
Мерапрыемства будзе на беларускай мове.
Рэгістрацыі не патрэбна, проста прыходзьце.