Гарадскі квэст «Таямніцы паўстання Кастуся Каліноўскага» ў Вільні

У нядзелю, 21 чэрвеня, беларусаў Вільні клічуць на гарадскі квэст «Таямніцы паўстання Кастуся Каліноўскага», прысвечаны 200-годдзю Зыгмунта Серакоўскага, аднаго з кіраўнікоў паўстання 1863–1864 гадоў.

Уявіце, да вас трапляе цыдулка ад Яські-гаспадара з-пад Вільні:

«Дзецюкі! Ехаў да нас чалавек давераны з паролямі, што адкрыюць месца і час збору. Ды перахапілі яго царскія круцялі. Ёсць у Вільні людзі верныя, што пераправілі новыя паролі. Застаецца толькі сабраць тыя словы. І хто ж гэтую справу зробіць, як не вы, дзецюкі!»

Вашая задача — прайсці па вуліцах Вільні, сустрэцца з паўстанцамі і іх ворагамі, сабраць словы новага пароля і дапамагчы атраду даведацца пра бяспечнае месца збору.

Пасля такога квэсту вы будзеце ведаць пра паўстанне Каліноўскага больш, чым пасля любой лекцыі!

Каб прыняць удзел, трэба:

• зарэгістравацца сола (тады вам знойдуць каманду на старце) альбо сабраць каманду да 6 чалавек, выбраць назву і кіраўніка. Ён мусіць зарэгістраваць каманду праз форму па спасылцы ўнізе;
• добра зарадзіць тэлефон і ўключыць мабільны інтэрнэт. Гугліць не толькі можна, але і трэба;
• прыйсці ў нядзелю, 21 чэрвеня а 14:00 на старт. Хто пройдзе квэст хутчэй за ўсіх, той пераможца.