22 жніўня ў антыкафэ «Sweet Home» пройдзе выстава гомельскай мастачкі Аляксандры Дзідзенка. Карціны мастачкі палохаюць нават яе ўласную маці. Жанчына хавае іх у шафу, каб не натыкацца вачыма.
У 2012 годзе Аляксандра Дзідзенка сумесна з дызайнерам Яўгенам Іванчыкам стварыла арт-праект. Тады пад псеўданімам «Z» яна прадставіла выставу пад назвай «Жанчыны, якіх я бачыла». На карцінах былі намаляваныя мінакі, наведвальніцы супермаркетаў, цыганкі з каралямі з металічных манет.
Новая выстава Аляксандры аб’яднаная думкай, што чалавек не ідэальны. У якасці выразнага сродку выкарыстоўваюцца няправільныя рысы твару: крывыя раты, непрапарцыйна вялікія вочы.
Пасля выставы гасцей чакае вечарынка. Падрабязнасці можна даведацца на старонцы мерапрыемства «Вконтакте». Пачатак выставы ў 18:00.
