Канцэрт Рамана Абрамчука

Штармавое папярэджанне: 16-га ліпеня ў Мінску пройдзе абрыкосавы град.

Сапраўды, абрыкосы накрыюць усіх, хто прыйдзе ў клуб “Графіці” 16 ліпеня. Незвычайная стыхія разгуляецца з нагоды выхаду альбома Рамана Абрамчука “Мая сакральная геаграфія”, дзе песня пра містычны Абрыкос з’яўляецца галоўнай (слухаць альбом можна тут).

Разам з Р. Абрамчуком арашаць зямлю абрыкосамі будуць такія знаныя мэтры мінскай падпольнай гаспадаркі як Віктар Сямашка (чароўны кларнет), Раман Яраш (спевы і медытацыя), Ігар Адасік (планетарная перкусія), Антон Рудак (гангста-вершы) і іншыя садоўнікі і аграномы. Гледачам прапануецца пачэсная роля збіральнікаў абрыкосавага ўраджаю.
Раман Абрамчук – малады аўтар-выканавец, які вось ужо напрацягу некалькіх гадоў стала не ўваходзіць у лік найбольш знакамітых артыстаў нашай краіны, пастаянна не гучыць на радыёстанцыях сталіцы, цвёрда замацаваўся па-за спісамі ўсіх хіт-парадаў, упэўнена пралятае на найбольш прэстыжных конкурсах і фестывалях. “На х..р трэба?”, – пытаецца сам у сябе Раман. “Абы абрыкосы квітнелі і Песня гучала!”, – так каментуе музыка гэтую сітуацыю. Што за містычныя абрыкосы знаходзяцца ў кішэнях артыста і яго таварышаў, і што за Песня гучыць у іх галовах – даведаецца той, хто не збаіцца стыхіі і прыйдзе ў самы яе эпіцэнтр. Такім чынам, яшчэ раз: 16 ліпеня, аўторак, клуб Графіці, 19-00.

…а пакуль усе рыхтуюць інвентар тут:
http://vk.com/event54847137
https://www.facebook.com/events/1385173555028888/