У суботу, 20 жніўня, мінскі кінаклуб Delirium запрашае паглядзець праграму брытанскага кіно для заўзятых сінефілаў, пяшчотна падабраную грандсінефілам Сяргеем Пукстам, які будзе мадэраваць паказ.
Дата: 20 жніўня
Час: 19.00
Месца: Партызанскі пр-т, д. 2/1 (3 паверх), Мінск
Слова спадару Сяргею:
«Трэба рабіць учынкі. Хаця б на паперы. Хаця б у розуме. Хоць бы ў фармальна асэнсаваным неўратычным выплюхванні, той цвердзі збітага масла — у штуршку няўхільна млявых сцёгнаў. Здзейсніць паўсядзённы, па-жабінаму хлюпнулы подзвіг, руцінна зірнуўшы ў вочы смерці.
Fr.Bacon, станавіўся, вядома, з узростам рэптыльна-рэптылоідным. Падобным да правінцыйнага ваенрука. Ухайдоквал Бі-Бі-Сішных журналістаў, адначасна надзіраючыся, правальваючыся ў развагах.
Мы ўбачым і нават адчуем пачуццё перамогі аб’екта над суб’ектам. Без грама таннай насякомаеднасці доктара Лектара (прычым тут ён? — а-а, рэптыльнасць).
І — вішанька (на торце?) — малады і нечаканы Дэніэл «Бонд» Крэйг (цяжка паверыць, што ў Брытаніі высунуўся настолькі сярэдні акцёр) у біяграфічным урывачку з «Каханне — гэта д’ябал». Дзе герой байопіка па-акцёрску зжырае яго, не задушыўшыся.
І напрыканцы — зусім іншая гісторыя — шэдэўр у жанры proto-(meta?)-commentary mocumentary Піцера Уоткінса «Калодэн».
Калі адчуваеце, што гэта для вас, — рэгіструйцеся па спасылцы.
Уваход — данэйшн.
